Rrugicat e Rajonit Nr. 1 në Elbasan po marrin formë të re

Në Rajonin Nr. 1 po punohet për përmirësimin e rrugicave në çdo lagje dhe në zonat informale, me qëllim që ato të bëhen më të aksesueshme dhe me standarde bashkëkohore për të gjithë qytetarët.
Ky rajon, i cili prej kohësh ka qenë pjesë e prioriteteve të Bashkisë Elbasan, është shndërruar në një mini-kantier ndërtimi, ku po kryhen punime për asfaltimin, ndriçimin dhe sistemimin e infrastrukturës urbane.
Punimet po shtrihen në disa zona të dendësuara të qytetit, me synim rritjen e cilësisë së jetesës dhe lehtësimin e qarkullimit për banorët.
Krahas ndërhyrjeve në rrugë, në Rajonin nr. 1 janë realizuar edhe një sërë investimesh të tjera që po e transformojnë gradualisht pamjen dhe funksionalitetin e zonës.
Janë përmirësuar rrjetet e ujësjellësit dhe kanalizimeve, është zgjeruar ndriçimi publik dhe janë sistemuar hapësira publike që prej vitesh kishin mbetur të paprekura.
Gjithashtu, në këtë rajon po vijon puna për rikonstruksionin e objekteve arsimore dhe ndërtimin e një çerdheje të re në lagjen “Kongresi i Elbasanit”, që do të ofrojë kushte më të mira për fëmijët e zonës.
Kryetari i Bashkisë Elbasan, Gledian Llatja, ka theksuar se “transformimi i çdo rajoni është pjesë e vizionit për një Elbasan më të aksesueshëm, më të ndriçuar dhe më të jetueshëm për të gjithë”.
Sipas tij, puna që po bëhet në Rajonin nr. 1 është shembulli konkret i angazhimit për të sjellë standarde të reja urbane dhe për të përmirësuar ndjeshëm infrastrukturën në çdo lagje të qytetit.