Thyen “arrestin në shtëpi”, kapet i dehur pas aksidentit rrugor

Një aksident rrugor i ndodhur në Sukth ka çuar në arrestimin e një 32-vjeçari, i cili jo vetëm drejtonte automjetin në gjendje të dehur, por rezultoi edhe person në kërkim nga drejtësia. Shtetasi Alfred Dumi u ndalua nga shërbimet e Policisë Rrugore menjëherë pas përplasjes së automjetit me disa pemë anës rrugës.

Sipas njoftimit zyrtar, policia u sinjalizua për aksidentin dhe mbërriti në vendngjarje për të kryer veprimet procedurale. Gjatë kontrollit, drejtuesi i mjetit iu nënshtrua testit të alkoolit, ku në matjen e dytë rezultoi me 1.29 mg/l alkool në gjak, nivel shumë më i lartë se normat e lejuara për drejtimin e automjetit.

Nga verifikimet e kryera në sistem, u konstatua se 32-vjeçari ishte aktualisht në kërkim, pasi kishte thyer masën e sigurisë “arrest në shtëpi”. Gjykata e Tiranës e kishte dënuar në vitin 2024 me dy vite burgim për veprën penale “Krijimi i skemave të mashtrimit lidhur me tatimin mbi vlerën e shtuar”.

Sipas hetimeve, në vitin 2022, Alfred Dumi kishte administruar një subjekt tregtar, përmes të cilit ishin lëshuar fatura fiktive me qëllim shmangien e detyrimeve tatimore. Skema mashtruese, ku përfshiheshin edhe 12 subjekte të tjera, i ka shkaktuar buxhetit të shtetit një dëm të konsiderueshëm prej rreth 300 milionë lekësh.

Si pasojë e aksidentit në Sukth, pasagjeri që ndodhej në automjetin e drejtuar nga 32-vjeçari pësoi dëmtime të lehta dhe mori ndihmë mjekësore. Në përfundim të veprimeve procedurale, Alfred Dumi u vu në pranga dhe pritet t’i dorëzohet Policisë së Tiranës për veprime të mëtejshme, ndërsa materialet hetimore iu referuan Prokurorisë për ndjekje të mëtejshme penale.