Vrasësi me pagesë i Saimir Jakut u arrestua pranë gjykatës, ishte në…
Policia në bashkëpunim me prokurorinë e Lezhës kanë arritur që të zbardhin pas 6 vitesh, vrasjen e ish-drejtorit të OST-së, Saimir Jakut. Krimi ndodhi më 9 shtator të vitit 2016 në një lokal në qendër të Rrëshenit dhe me urdhër të prokurorisë së Lezhës është ndaluar një 40-vjeçar nga Kruja. Sipas policisë 40-vjeçari nga Kruja kreu vrasjen me pagesë, ndërsa në banesë iu sekuestruan 21 celularë.
Dorjan Keqi, vrasësi me pagesë i arrestuar për ekzekutimin e Saimir Jakut në Rrëshen, u arrestua pranë gjykatës së Lezhës. Ai ishte aty i pranishëm, pasi kishte një proces gjyqësor për drejtimin e makinës pa leje qarkullimi. Vrasja ndodhi në vitin 2016.
Drejtori i Drejtorisë Vendore të Policisë Lezhë, Vehbi Bushati, tha se si rezultat i veprimeve të thelluara hetimore dhe profesionale, bënë të mundur dokumentimin me prova ligjore të ngjarjes.
Sipas bluve të Lezhës, porositësit e vrasjes dyshohet të jenë një grup i strukturuar kriminal që vepron në qarkun Lezhë, tashmë të identifikuar dhe nën hetim nga ana e Policisë. Për shkak të cilësisë së hetimit dhe të ruajtjes së sekretit hetimor, policia nuk bën publike të dhëna të tjera për këtë çështje.
Gjatë kontrollit të ushtruar në banesën e Dorjan Keqit, u gjetën dhe u sekuestruan në cilësinë e provës materiale 21 aparate celulare dhe 6 mbajtëse të kartave SIM. Dorjan Keqi akuzohet për veprat penale “Vrasja në rrethana të tjera cilësuese”, kryer në bashkëpunim dhe “Prodhimi dhe mbajtja pa leje e armëve luftarake e municionit”.
