Zemra e të miturit kishte dy çarje, 15-vjeçari mbijetoi pas një operacioni emergjent

Një 15-vjeçar u plagos rëndë me thikë pranë zemrës gjatë një konflikti mes disa gjimnazistëve në Durrës. Ngjarja e rëndë solli transportimin e menjëhershëm të të miturit në Spitalin Rajonal të Durrësit, ku iu nënshtrua një ndërhyrjeje të vështirë kirurgjikale.

Në njoftimin zyrtar, spitali bën të ditur se i mituri mbërriti në gjendje kritike, me dëmtime të rënda në zona jetike.

“Një 15-vjeçar mbërriti në urgjencë në gjendje tejet kritike, me plagë të shumta penetruese dhe dëmtime të organeve të brendshme nga mjeti prerës. Zemra kishte dy çarje nga 2 cm, me tamponadë kardiake, ndërsa në regjionin e corpus ventrikuli u konstatua një çarje 3 cm në stomak. Gjendje kufi,” thuhet në njoftim.

Sipas spitalit, pacienti u fut menjëherë në sallën e operacionit dhe ekipi kirurgjikal kreu një ndërhyrje urgjente dhe të ndërlikuar për të menaxhuar plagët jetike dhe për të rikthyer stabilitetin hemodinamik.

“Ndërhyrja u realizua me reagim të shpejtë dhe pa humbur asnjë minutë. Mirënjohje për kirurgët F. Shini dhe E. Demiraj, si dhe për anestezistin A. Banushi, të cilët e çuan rastin drejt suksesit me profesionalizëm dhe qetësi operative,” shton më tej spitali.

15-vjeçari aktualisht po trajtohet në Reanimacion dhe ndodhet në gjendje të stabilizuar, ndërsa pritet nën monitorim të vazhdueshëm nga ekipi mjekësor.