Zgjedhjet te Stomatologët, Unioni reagon: Lajme të rreme, organet drejtuese janë zgjedhur në 2025

Unioni i Stomatologëve Shqiptarë (USSH) ka reaguar zyrtarisht duke përgënjeshtruar lajmet e qarkulluara në disa portale online në lidhje me zgjedhjen e një presidenti të ri në krye të këtij institucioni. Përmes një deklarate për mediat, USSH i ka cilësuar këto raportime si të pavërteta dhe me qëllim dezinformimin e opinionit publik, si dhe çorientimin e komunitetit të stomatologëve dhe ndihmësstomatologëve në vend.

Në sqarimin e tij, Unioni thekson se procesi i ligjshëm zgjedhor për organet drejtuese, përfshirë postet e Presidentit dhe Zëvendëspresidentit për mandatin e ardhshëm 2025-2030, është përmbyllur me sukses që në datën 16 prill 2025. Sipas njoftimit, këto zgjedhje nuk janë kontestuar në asnjë organ gjyqësor dhe kanë marrë njohjen e plotë nga të gjitha institucionet publike të Republikës së Shqipërisë.

Gjithashtu, bëhet e ditur se edhe Ministria e Shëndetësisë i ka njohur rezultatet, duke caktuar përfaqësuesit e saj në organet përkatëse të USSH. Duke i konsideruar lajmet e fundit si një përpjekje për të minuar legjitimitetin e tyre, Unioni ka bërë me dije se po e ndjek këtë çështje pranë institucioneve kompetente ligjore. Ndërkohë, USSH siguron se po vazhdon normalisht veprimtarinë e saj në përmbushje të misionit të përcaktuar me ligj.