Zhdukje apo vrasje? Nga ADN do të përcaktohet nëse trupi i pajetë në Spanjë është i Miklovan Dakajt

Miklovan Dakaj është gjetur i pajetë në Marbella të Spanjës. Trupi i pajetë u konstatua pranë brigjeve të detit. Interpol Tirana është në komunikime të vazhdueshme me autoritetet spanjolle në lidhje me hetimet për këtë rast. Lidhur me ngjarjen e rëndë kanë shkruar edhe mediat spanjolle, sipas të cilave 30-vjeçari nga Shkodra mund të jetë vrarë.

Autoritetet spanjolle kanë marrë kampionë gjenetikë të vëllait dhe vajzës së 30-vjeçarit me origjinë nga Shkodra dhe pritet që ekspertiza të zbulojë përgjigjen e analizave në ADN-së. Kjo pasi deri më tani, familjarëve të të riut, si në Spanjë ashtu edhe në Shkodër nuk i është komunikuar zyrtarisht se trupi i gjetur i pajetë të jetë i Miklovan Dakajt.

Hetimet për zhdukjen e tij nisën pas denoncimit të të shoqes që deklaronte në policinë spanjolle se kishte humbur kontaktet me të shoqin, si dhe njëherazi një mesazh i dërguar në telegram ku e lajmëronte se nuk duhet ta kërkonte më Miklovanin pasi ishte vrarë dhe hedhur në det. Po ashtu, denoncim për zhdukjen e tij u bë edhe nga familjarët në Shkodër.

Dakaj është hetuar nga policia spanjolle si person i lidhur me grupe kriminale të trafikut të drogës, ndërsa dyshohet se përdorte edhe identitete të tjera për t’iu fshehur policisë. Përfshirja e tij në trafik është edhe pista kryesore që po hetohet lidhur me zhdukjen.