Arrestimet/ISIS planifikonte akte terroriste në ndeshjen Shqipëri-Izrael

Kryesore E Martë, 4 Maj 2021 15:01

Paralajmërimet e shërbimeve sekrete për sulme të mundshme terroriste kanë zhvendosur ndeshjen mes Shqipërisë dhe Izraelit nga Shkodra për në Elbasan.

Kjo raportohet nga e përditshmja izraelite “Haaretz”, e cila i referohet edhe raportimeve të mediave shqiptare për arrestimet e kryera së fundi në Shkodër, të të dyshuarve për lidhje me organizatat terroriste.

“Zyrtarët e sigurisë në Izrael kanë nxjerre udhëzime strikte për ekipin. Futbollistët nuk do të kenë kohë të lirë, ndërkohë që në Shqipëri do të kenë tre herë më shumë roje sigurise nga sa kanë zakonisht”, shkruan “Haaretz” duke iu referuar burimeve pranë ekipit kombëtar.

Një tjetër media si “Jerusalem Post” shkruan se katër persona të lidhur me ISIS u ndaluan nga autoritetet shqiptare, pas një informacioni nga Mossad (shërbimi sekret izraelit), se ata po planifikonin sulm terrorist gjatë ndeshjes Shqipëri-Izrael.

Më tej “Jerusalem Post” shkruan se ekimi i Izraelit po vjen në Shqipëri me një ekip shtesë sigurie prej 15 vetësh.

Burime të AbcNews bënë me dije se zhvillimi i këtij aktiviteti sportiv mund të kërcënohej nga akte terroriste esktremiste dhe vendndodhja e stadiumit “Loro Boriçi”, në një zonë të rrethuar nga shtëpi banimi dhe rrugica të shumta, nuk ofronte garanci të plota për sigurinë e njerëzve gjatë ndeshjes së futbollit që do të luhet këtë të shtunë.

Lajmi i zhvendosjes së ndeshjes në “Elbasan Arena”, është konfirmuar zyrtarisht nga Federata Shqiptare e Futbollit, duke lënë të kuptohet se janë motivet e sigurisë ato që kanë sjellë këtë lëvizje. Sipas ekspertëve të sigurisë, stadiumi i Elbasanit është më i kontrolluar dhe masat e sigurisë janë plotësisht efikase atje.

Por çfarë ka qenë ky kërcënim apo sinjal për akte terroriste, që ka detyruar këtë masë të jashtëzakonshme tre ditë përpara takimit Shqipëri- Izrael? Agjentë të Shërbimit Informativ Shtetëror, të Prokurorisë për Krime të Rënda dhe shërbimeve partnere kanë përgjuar dhe mbajtur nën vëzhgim një celulë të dyshuar ekstremiste, të lidhur me ISIS. Një pjesë e kësaj celule, u godit pak ditë më parë duke arrestuar disa persona, të cilët thuhej se kishin planifikuar aksione terroriste në Shqipëri.

Pikërisht operacioni i fundit i policisë dhe prokurorisë për Krime të Rënda, të cilët arrestuan 4 persona, besimtarë myslimanë, të dyshuar si pjesë e një celule ISIS-i në Shqipëri, duket se është i lidhur me zhvendosjen e ndeshjes për eleminatoret e botërorit. Burimet thanë se arrestimi i Ergys Faslisë, Bekim Protopapës, Xhezahir Fishtit e Medat Hasanit, erdhi pas dyshimeve se këta të fundit po organizonin një sulm terrorist gjatë aktivitetit sportiv që do të organizohej të shtunën në “Loro Boriçi”.

Një akt i tillë mund të ndërmerrej ndoshta i nxitur nga prania e sportistëve hebrenj në Shqipëri, si një hakmarrje simbolike e terroristëve islamikë ndaj shtetit të Izraelit. Kjo simbolikë i ka shtuar më shumë dyshimet dhe verfikimet e institucioneve të sigurisë, të cilat kanë vendosur zhvendosjen e ndeshjes.

Burimet thanë se nga materialet e Shërbimit Informativ Shtetëror, i ndihmuar edhe nga agjensitë e huaja të spiunazhit, kanë referuar informacione se 4 të arrestuarit në Shqipëri, në bashkëpunim me 7 personat e arrestuar në Kosovë dhe disa të tjerë në Maqedoni, po planifikonin një sulm me shpërthim jashtë stadiumit “Loro Boriçi” dhe më pas me armë zjarri, gjatë ndeshjes Shqipëri- Izrael sqaron edhe lapsi.al

Katër të dyshuarit në Shqipëri po hetohen për akuzën e “akteve terroriste” të mbetur në tentativë, pasi janë krijuar dyshime të arsyeshme se kanë bërë disa veprime konkrete për të finalizuar sulmin me eksploziv dhe më pas me armë. Këtë sulm, grupi hetimor thotë se e kanë koordinuar edhe me disa shtetas të tjerë, të cilët gjithashtu janë nën hetim në Kosovë dhe Maqedoni.

Personat në fjalë kanë qënë në vëzhgim dhe përgjim prej disa kohësh, por shkak për ndërhyrjen dhe arrestimin e tyre mbrëmjen e së premtes së kaluar, është bërë frika e ndonjë incidenti të mundshëm terrorist gjatë meshës së lumturimit të 38 martirëve të kishës katolike në Shkodër. Kjo frikë, siç duket ka qenë edhe arsyeja që në ceremoninë në fjalë të mungonin disa krerë të institucioneve shtetërore.

Masat e sigurisë në Elbasan do të jenë tepër të larta dhe forca të shumta të policisë dhe shërbimeve sekrete do të garantojnë zhvillimin normal të ndeshjes së futbollit Shqipëri- Izrael.

Zbardhen detaje të arrestimit të 4 të dyshuarve për terrorizëm në Shqipëri dhe shoqërimin e 16 personave të tjerë, mes tyre pesë shqiptarëve nga Kosova. Abc News ka mësuar emrat e pesë shtetasve shqiptarë të Kosovës, që u ndaluan mbrëmjen e së premtes në Shqipëri bashkë me Ergys Faslin, Bekim Protopapën, Xhezair Fishtin e Medat Hasanin. Sipas këtyre burimeve ata janë Saber Beha, Taulant Musliu, Shkodran Mustafa, Fidan Ademi dhe Lulzim Kabashi. Të pesëtë këta të ndaluar, mësohet se janë mbajtur për disa orë të shqoqëruar dhe më pas i janë dorëzuar autoriteteve të policisë kosovare me cilësinë e të depërtuarve.

Arrestimi i tyre mësohet se është bërë gjatë takimit që ata po zhvillonin me dy nga të arrestuarit nga Shqipëria. Burimet dyshojnë se shkaku i ardhjes së tyre në Shqipëri, ka qenë bashkëpunimi për të kordinuar veprimet e mëtejshme, që dyshohet se ata po pregatisnin për të sulmuar me eksploziv stadiumin “Loro Boriçi” gjatë ndeshjes Shqipëri-Izrael. Në të njejtën kohë, mësohet se edhe policia e Kosovës ka ndërhyrë në disa lokalitete në Prishtinë, Mitrovicë, Gjilan ku ka të arrestuar 9 persona. Burimet thonë se dy nga këta të arrestuar në Kosovë, kanë pranuar të bashkpëunojnë duke treguar edhe planet dhe kontaktet me personat e tjerë për dyshimet e një sulmi terrorist.

SHKARKO APP

iPhone

Android

Më shumë lajme të fundit