Lulzim Basha: Rama-Marku mbyllën dosjen e Tahirit dhe Shullazit

Prokurorja e Përgjithshme, Arta Marku urdhëroi sot nisjen e hetimeve për 10 kolegë të saj në Prokurorinë e Krimeve të Rënda. Hetimi nisi për shkak të refuzimit nga ana e prokurorëve për të marrë pjesë në heshtjen e shortit për përfaqësimin e dosjes së Emiljano Shullazit në Gjykatë. Po sot, prokurorët e parë që hartuan dosjen e Shullazit dhe Saimir Tahirit mësohet se janë transferuar nga Prokuroria e Tiranës në prokuroritë e rretheve.

Lëvizjet e Prokurorisë u argumentuan me mbi rezultatet e tyre në punë dhe në faktin se nuk pranuan të merrnin pjesë në shortin e çështjeve.

Por për kreun e opozitës, pas vendimit të kryeprokurores Arta Marku fshihen qëllime e kryeministrit Edi Rama që lidhen me mbylljen e dy dosjeve të bujshme.

Në një reagim në rrjetet sociale, Lulzim Basha shprehet se me këto lëvizje, Arta Marku po mbyll dosjen e Emiljano Shullazit, njëlloj siç po përgatit dhe mbylljen e dosjes së ish-ministrit të Brendshëm, Saimir Tahiri. “Siç e kemi paralajmëruar. Sot Rama-Marku shkatërruan përfundimisht hetimin për Tahirin duke përgatitur mbylljen e dosjes ndaj tij. I njëjti skenar po zbatohet për të lehtësuar Shullazin. Drejtësia ka mbaruar. Krimi po triumfon”,- shkruan në reagimin e tij, Lulzim Basha.

Emrat e prokurorëve ndaj të cilëve nisi hetimi disiplinor

Olsian Çela

Përparim Kulluri

Behar Dibra

Sonila Muhametaj

Arenc Çela

Edvin Kondili

Pranvera Pustina

Eugen Beçi

Blerim Tominaj

Besim Hajdarmataj