Ben Manaj: Klaudia Hila po bën njerëzoren dhe burrneshën; ajo po bën Hillari Klintonin e këtij shekulli!

Nga Ben Manaj (Londër)-

Video-skandali me “haremin” e Adi Hilës, Sulltanit aktual të kompozicionit muzikor shqiptar, përveç tronditjes në shoqëri nga “imoraliteti me klering” i disa figurave të showbizit, ka prodhuar një lajm pozitiv, që të konfirmon besimin se ka plot gra shqiptare, të cilave nuk u mungon dinjiteti dhe forca për të përballuar tërmete të tilla familjare, siç është rasti i gruas së Adi Hilës, Klaudia Hilës, dhe vajzave të tyre!
Përballë tradhtisë dhe poshtërimit në mexhlis, që i bënë disa ish-të njohura besëpreme të saj, që shkuan në shtratin e bashkëshortit të saj, Klaudia ka bërë një lloj “Ngritjeje të Feniksit”, përmes jo aq faljes, sesa respektimit të ndjenjës së dashurisë ndaj njeriut me të cilin ka kaluar pjesën më të madhe të jetës së saj të rritur dhe babait të vajzave!
Ajo raportohet se po i rri pranë burrit të saj, i cili, si edhe viktimat, ndodhet në syrin e ciklonit popullor të ndëshkimit dhe turpit, të cilin ai dhe ato e meritojnë, për mua, plotësisht, në raport me gruan e tij, Klaudian!
Edhe pse çifti, nga burimet e mia të sigurta, edhe pse nuk i njoh personalisht dhe nuk i kam takuar asnjëherë, ka pasur një ftohje dhe krizë të madhe mes tyre prej kohësh, që rëndom i kalojnë shumë çifte, por që, për hir të vajzave, kanë ruajtur në publik një imazh të një çifti deri diku normal, e megjithëkëtë, Klaudia po i qëndron afër Adi Hilës në këto momente tejet delikate të shëndetit mendor dhe fizik!
Adi Hila ka kryer mëkat në raport me bashkëshorten e tij dhe fëmijët, një degradim moral dhe bjerrje të personalitetit të tij njerëzor, që do ta shoqërojë atë tërë jetën e tij dhe do të jetë, do apo s’do, pjesë e CV-së së tij, si individ dhe njëkohësisht si talent i jashtëzakonshëm muzikor!
Cilatdo qofshin motivet, rrethanat e tij personale apo edhe cenet morale e të personalitetit, pa harruar edhe fibrën e tij morale dhe raportin me femrat dhe seksin, Adi Hila ka bërë autogolin më të madh që një mega-talent mund t’i bëjë karrierës dhe trashëgimisë së tij profesionale!
Këngët dhe aranzhimet e tij muzikore, si dhe kontributi artistik, përpos çfarë ka ndodhur, do të jetojnë përtej jetës së tij fizike, edhe pse do të jetë e vështirë të harrohen mëkatet e tij orgjiake nga brezat që frymojnë sot, pavarësisht nga mosha!
Por, kur bashkautorët e tij, femra dhe meshkuj, do të duhet ta mbajnë kokën ulur, bashkë me hamshorin Adi Hila, ndryshe nga ata/ato, si Eli Fara, meqë është shprehur publikisht, kokën lart realisht po e mban Klaudia Hila!
Dhe për këtë, ajo duhet vlerësuar dhe duartrokitur, sipas formimit të gjithsecilit, qartazi, pasi ajo demonstron klasin, formimin dhe forcën e saj për t’i dhënë, ndoshta, një shans të dytë burrit të saj mëkatar!
Në fund të fundit, çdo njeri e meriton një shans të dytë, argumentueshëm, pasi jemi të gabueshëm, si Mammalia, ose gjitarë!
Klaudia Hila po bën njerëzoren dhe burrneshën; ajo po bën Hillari Klintonin e këtij shekulli!
Me siguri ajo fal, por nuk harron!
Ka edhe gra të tilla në Shqipëri, siç ka edhe nga ato që e prenë në besë kur i bënin shoqëri, kur me burrin e saj dhe dëshirën e tij bënin… E dini të gjithë termin pezhorativ!