Debate në Këshillin e PD për ndryshimet në statut. Rrëzohet propozimi i Imamit

Partia Demokratike ka nisur mbledhjen e Këshillit Kombëtar ku do të diskutohen ndryshimet në statutin e kësaj partie.

Sekretari i Përgjithshëm, Arben Ristani ka propozuar ndryshimet në statut. Arben Imami, një prej zërave kritikë me Bashën, kërkoi që të futet në rend të ditës edhe analiza e zgjedhjeve, por kjo kërkesë u rrëzua me votë. Në takim, bie në sy mungesa në mbledhje e ish-kryeministrit Sali Berisha.

Një tjetër propozim ka qenë ai i Edvin Kullurit, i cili kërkoi që të shqyrtoheshin edhe draftet alternative në mbledhjen e Këshillit Kombëtar. Kulluri i kërkoi Bashës të merrte në shqyrtim propozimin e tij dhe të Edit’h Harxhit si dhe atë të anëtarit tjetër të Këshillit Kombëtar, Gent Malko.

Pas rrëzimit të propozimeve, Arben Imami dhe Edvin Kulluri kanë braktisur mbledhjen e Këshillit Kombëtar të PD si dhe kanë akuzuar Bashën se po i jep vetes mandat të përjetshëm.

Imami ka thënë për mediat se mbledhja është fiktive, përsa kohë po diskutohet vetëm një draft. “Nuk është një ditë e bukur kjo për PD-në. Mbledhja është fiktive, përsa kohë po diskutohet vetëm një draft”,- tha Imami.

Ndryshimet statutore do t’i nënshtrohen votës finale në Kuvendin Kombëtar të 28 prillit. Pika që ka ngjallur me shumë debate te kritikët e Bashës është neni për kryetarin, i cili nuk parashikon dorëheqjen në rast të humbjes së zgjedhjeve.