Deputetët e Holandës takojnë Ramën: Nuk jeni gati për negociatat

Komisioni Europian dha dritën jeshile për çeljen e negociatave të anëtarësimit, fjalën e fundit e kanë vendet anëtare të BE-së, por jo të gjitha shtetet anëtare të BE janë pro çeljes së negociatave. Në listën e vendeve skeptike për zgjerimin e BE-së me vendet e Ballkanit Perëndimor është edhe Holanda. Një delegacion nga Holanda ka mbërritur sot në Tiranë për të parë ecurinë e reformave të ndërmarra deri tani në kuadër të integrimit në Bashkimin Europian.

Delegacioni i cili përbëhet nga një grup deputetësh është takuar me kryeministrin Edi Rama. Më pas ata janë takuar me kreun e PD-së Lulzim Basha dhe deputeten Jorida Tabaku. Në një prononcim për mediat pas takimit me Ramën dhe Bashën, ata u shprehën se Shqipëria ende nuk është gati për hapjen e negociatave për integrimin në BE.

Deputeti Pieter Omtzigt nga Partia Kristian Demokrate u shpreh nuk mjafton vetëm ajo që është bërë, ndërsa kërkuan që zyrtarët e korruptuar të çdo niveli të dalin para drejtësisë. Një tjetër shqetësim i ngritur nga deputetët ishin edhe kriminaliteti shqiptar në Holandë, që sipas tyre është rritur në vitet e fundit.

“Është bërë një propozim nga Komisioni Europian dhe për çeljen e negociatave dhe për këtë qeveria jonë e ka tashmë pozicionin e saj të shprehur dy javë më parë. Qeveria jonë është ekstremisht hezituese për hapjen e negociatave me Shqipërinë këtë moment. Prandaj ne si parlament vendosëm të organizojmë këtë mision faktmbledhës me anëtarë të 7 partive të ndryshme politike holandeze pra të gjitha partitë kryesore janë këtu. Më pas ne do te kemi një debat se si po shkon zbatimi 5 prioriteteve. Anëtarët e delegacionit kanë bërë shumë pyetje ndër me kryesoret ato që lidhen me luftën ndaj korrupsionit dhe krimit të organizuar. Qeveria jonë do ta thotë fjalën e fundit, por përpara do të duhet të ketë aprovimin final nga parlamenti”,- tha deputeti i parlamentit të Holandës.

Deputetët holandezë kanë shprehu rezerva dhe për rezultatet e Vettingut, duke deklaruar se 7 raste mes 800 gjyqtarëve dhe prokurorëve që duhen marrë për shqyrtim janë shumë pak.

Ndërsa vendet e tjera kanë pasur rezerva për përmbushjen e kritereve, deputetët e Holandës kanë pasur dhe një kusht shtesë që vjen nga niveli i krimit shqiptarë në vendin e tyre. “Ne jemi këtu për të parë zbatimin e 5 kushteve dhe progresin e bërë deri më tani. Në lidhje me 5 prioritetet ne kemi folur me gjyqtarë të përfshirë në veting dhe tani kemi 6 apo 7 raste vetingu por totali është 800 për t’u shqyrtuar. Kemi parë gjithashtu progres në luftën me krimin e organizuar por nga ana tjetër shikojmë që në Holandë numri shqiptarëve të arrestuar për krime serioze është dyfishuar krahasuar me vitin e shkuar”,- tha deputeti Pieter Omtzigt nga Partia Kristian Demokrate.

Duke parë deklaratat që janë bërë në Tiranë, duket se dhe qëndrimi i deputetëve holandezë do të jetë edhe me kritikë gjatë votimit në Holandë.

Gjermania, Franca dhe Holanda janë tre vendet skeptike për hapjen e negociatave në fund të qershorit. KE vendosi që të rekomandojë hapjen e negociatave në 17 prill, por deri në fund të qershorit qeveria shqiptare duhet të lobojë fuqishëm për të bindur vendet skeptike që të thonë “PO”.