Këshilli Ambasadorëve Shqiptarë që përbehet nga ish-ministra të Jashtëm dhe diplomatë karrierë ka reaguar sot për gjestin fyes ndaj qytetarëve të kryetarit të Pranisë së OSBE-së në Shqipëri, Bernd Borchard.
Në deklaratën e Këshillit të Ambasadorëve kërkohet që drejtuesit e organizatës së OSBE në Vjenë të reagojë lidhur me aktet fyese personale të diplomatit të tyre në Tiranë. “Ne mbesim besimplotë se sjellje të tilla të pa kujdesshme dhe jo profesionale të Kryetarit të Pranisë të OSBE-së në Shqipëri do të shqyrtohen me seriozitet nga zyrtarët më të lartë të Organizatës, nga Kryesia e Radhës dhe nga Sekretariati i OSBE-së, si dhe do merren masat përkatëse disiplinore në linjë me rregullat, kodin e etikës dhe proçedurat e tjera për raste të tilla”,- thuhet në deklaratën e Këshillit të Ambasadorëve.
Duke e cilësuar si jo etik dhe fyes reagimin e Borchard, Këshilli i Ambasadorëve thotë se qëndrime të tilla dëmtojnë reputacionin e organizatës së OSBE në Shqipëri. “Në këtë kuptim, reagimi i zotit Borchard ishte fyes, aspak etik dhe mbi të gjitha jo dinjitoz për një përfaqësues të lartë të OSBE-së, misioni i të cilit është të ndihmojë Shqipërinë të ndërtojë institucionet e saj demokratike dhe sundimin e shtetit ligjor. Mungesa e respektit e reagimeve të tilla mund të cenoje reputacionin dhe besueshmërinë e organizatës në Shqipëri”,- thuhet në deklaratën e Këshillit të Ambasadoreve.
Këshilli i Ambasadorëve përbëhet nga diplomatë dhe personalitete të njohura në vend; si Besnik Mustafaj, Arta Dade, Paskal Milo, Agim Fagu, Genci Muçaj, Arben Çejku, Marko Bello dhe shumë të tjerë.
Deklarata e plotë e Këshillit të Ambasadorëve
“Këshilli i Ambasadorëve Shqiptarë dëshiron të sjellë në vëmendjen e opinionit publik Shqiptar dhe trupit Diplomatik në Tiranë, reagimin jashtë normave të etikës qytetare të Kryetarit të Pranisë së OSBE-së në Shqipëri Bernd Borchard, gjatë një grumbullimi paqësor të një grupi protestuesish, ndërsa ushtronin të drejtën e tyre përballë drejtorisë së Policisë së Tiranës në datë 13 Tetor.
Ky reagim gjendet në link-un në Youtube: https://www.youtube.com/watch?v=Vm_wZ6Fugg8
Këshilli i Ambasadorëve Shqiptarë, ndërsa tregon një respekt dhe nderim të veçantë për të gjithë diplomatët e akredituar në Shqipëri, kërkon prej secilit prej tyre të respektojë popullin Shqiptar, si të drejtën legjitime të çdo Shqiptari për të protestuar paqësisht.
Për shkak të funksioneve të tyre diplomatike, por edhe preferencave personale, Kryetarët e OSBE-së në Shqipëri, përfshirë edhe zotin Borchard, kanë qenë figura të njohura në jetën publike të vendit. Për ketë arsye, ata nuk mund të pretendojnë imunitet nga kritikat për aktivitetet ose qëndrimet e tyre politike, për të cilat ata janë dhe do të jenë vazhdimisht në syrin kritik të publikut.
Në këtë kuptim, reagimi i zotit Borchard ishte fyes, aspak etik dhe mbi të gjitha jo dinjitoz për një përfaqësues të lartë të OSBE-së, misioni i të cilit është të ndihmojë Shqipërinë të ndërtojë institucionet e saj demokratike dhe sundimin e shtetit ligjor.
Mungesa e respektit e reagimeve të tilla mund të cenoje reputacionin dhe besueshmerinë e organizatës në Shqipëri.
Ne mbesim besimplotë se sjellje të tilla të pa kujdesshme dhe jo profesionale të Kryetarit të Pranisë të OSBE-së në Shqipëri do të shqyrtohen me seriozitet nga zyrtarët më të lartë të Organizatës, nga Kryesia e Radhës dhe nga Sekretariati i OSBE-së, si dhe do merren masat përkatëse disiplinore në linjë me rregullat, kodin e etikës dhe proçedurat e tjera për raste të tilla”.