Djegia e mandateve, Berisha: Të ndërmarrim çdo akt për rrëzimin e Edi Ramës

Shumica e deputetëve të PD që kanë folur sot në mbledhjen e grupit parlamentar janë rreshtuar pro propozimit të kryetarit Lulzim Basha për djegien e mandateve. Flamur Noka, Ervin Salijanji, Florion Mima, Oriola Pampuri dhe shumë të tjerë kanë deklaruar se djegia e mandateve duhet të bëhet në mënyrë urgjente dhe pa pritur teknikalitetet ligjore që kërkojnë një afat kohor prej 6 muajsh.

Pro këtij propozimi është dhe ish-kryeministri dhe ish-kreu i PD-së, Sali Berisha. Berisha si një nga njerëzit e PD që e ka shprehur i pari si nocion djegien e mandateve, është shprehur pro ndërsa ka deklaruar se duhen akte që çojnë në rrëzimin e kryeministrit Edi Rama dhe që shqiptarët të jenë të lirë.

“Duhet të ndërmarrim çdo akt që na çon tek rrëzimi i Ramës. Prova e këtij vendimi është, nëse ne me aksionin qytetar politik do t’u kthejmë shqiptareve votën e lirë, ne kemi marrë një vendim historik të drejtë. Po nuk arritëm që shqiptarët të votojnë të lirë, mbetemi fasadë. Nëse shkohet në këtë vendim, që nuk e kundërshtoj, përkundrazi, koha ka ardhur që të përballemi me këtë regjim me qëllimin e vetëm që shqiptarët të jenë të lirë”,- ka deklaruar Berisha në mbledhjen e grupit të PD.

Qëndrimi i Sali Berishës, pas atij të Lulzim Bashës, nënkupton se figurat më me ndikim në PD kanë dhënë tashmë orientimin që do të mbahet.

Ndërkohë që edhe deputetët e tjerë kanë përkrahur idenë që djegia e mandateve të përdoret si gjest që do të shërbejë për rrëzimin e Ramës dhe për krijimin e kushteve për zgjedhje të lira.

Pjesë nga deklaratat e deputetëve të PD në mbledhjen e gurpit:

Flamur Noka: Duhet djegia e mandateve, të bashkohemi me qytetarët. Nuk mund të jemi opozitë fasadë.  Ky është një regjim, nuk mund të sillemi normalisht.

Agron Duka: Në mënyrë absolute jam për djegien e mandateve.

Florian Mima: Jam për djegie mandatesh

Oriola Pampuri: Djegia e mandateve, akt sublim.

Ervin Salianji: Po flasim që t’i lëmë mandatet. Unë thashë duhet t’i lëmë dhe të gjejmë hapësirat ligjore që t’i lëmë që tani.

Andon Frrokaj: Pro djegies, ne i paraprijmë me sakrificë. Ne duhet të dalim t’i themi qytetarëve jemi si ju, pa asnjë ndryshim. Është koha për veprim.

Klevis Balliu: Pro djegies së mandateve. Mandatet tona nuk kanë vajtur në parlament.

Valentina Duka: Të gjithë qytetarët në rrjetet sociale ishin pro nesh. Në mënyre absolute jam me njerëzit, jam për djegien e mandateve.

Gent Strazimiri: Jam pro djegies së mandateve.

Aldo Bumçi: Djegie mandatesh, nuk futemi në asnjë lloj zgjedhjeje.

Agron Shehaj: Largimi i Ramës nuk është garancia e vetme për zgjedhjet e lira. Ne duhet të vëmë kusht hetimin e Ramës dhe arrestimin e atyre që kanë vjedhur në 2017. Unë jam dakord që mandatet duhen djegur, kjo është gjëja e duhur. Çështjet teknike i zgjidhni ju.