Fatmir Xhafa: Letra e komisionerit Johanes Hahn, thjesht një copë letër…!

Debat i egër në konferencën e kryetarëve të grupeve parlamentare. Pas sherrit mes Ilir Metës i cili kerkoi llogari kryetarit te komisionit parlamentar te Reformes ne Drejtesi, Fatmir Xhafa, ky i fundit ka thene se “Dje më ka ardhur vetëm një copë letër, e përkthyer. Letra e Komisionerit për Zgjerimin, Johanes Hahn, por ajo nuk është normë juridike dhe Komisioni nuk mund të mblidhet për një letër, ajo është një copë letër” u shpreh Fatmir Xhafa, kryetar i Komisionit të Posaçëm parlamentar për Reformën në Drejtësi.

“Prisja qe kjo të perkthehej në një normë juridike e pasqyruar në emailin e negociatorëve dhe atëherë të më vinte mua” u shpreh Fatmir Xhafa, duke ia lënë të gjithë fajin negociatorëve, që nuk arritën të binin dakort për reformën në drejtësi.

Me këtë deklaratë, Fatmir Xhafa u arsyetua për faktin se nuk mblodhi Komisionin për Reformën në Drejtësi, pasi nuk kishte një dokument juridik mbi të cilin të diskutonte.

Deputeti socialist bie në kundërshtim me deklaratën e shefit të tij, Kryeministrit Edi Rama i cili dje përshëndeti publikisht marrëveshjen e arritur me Partinë Demokratike me ndërmjetësimin e eurokomisionerit Hahn, duke lexuar edhe letrën e zyrtarit të BE.

Kjo marrëveshje PS-PD u përshëndet edhe nga vet Hahn por edhe nga Kancelarja gjermane Angela Merkel dhe zyrtarë të tjerë të lartë të BE.