Gjykata Kushtetuese rrëzon PD. Rama: Fillon pastrimi i Pallatit të Drejtësisë

Gjykata Kushtetuese ka dhënë sot vendimin për ankesën e PD që kërkonte shpalljen anti-kushtetues të ligjit të Vetingut.

Burime nga gjykata bëjnë me dije se kërkesa e PD është rrëzuar. Votimi ka qenë 6 me 2 kundër kërkesës së PD. Ende nuk janë dhënë detaje mbi argumentet që Gjykata Kushtetuese ka paraqitur kundër opozitës. Vendimi vjen pas kthimit të përgjigjes nga Komisioni i Venecias.

Me vendimin e sotëm, Gjykata i hap rrugën zbatimit të Vetingut, i cili parashikon kontrollin e figurës etike dhe pasurive të gjyqtarëve dhe prokurorëve në gjithë vendin.Ndërkohë Partia Demokratike e opozitës, ankimoi dje në Gjykatën Kushtetuese ligjin për Këshillin e Lartë Gjyqësor dhe Këshillin e Lartë të Prokurorisë.

Sipas partisë kryesore të opozitës, ligji është antikushtetues në mënyrën se si zgjidhen anëtarët e këtyre dy institucioneve të reja të ngritura me reformën e drejtësisë. PS akuzon PD se po kërkon të zvarrisë procesin.

PD e ankimoi vendimin pavarësisht thirrjes së ambasadorëve për të mos e apeluar. PD pretendonte se ligji i kaluar nga Edi Rama shkelte konsesusin e 22 korrikut dhe shkelte hapur kushtetutën.

Rama komenton vendimin e Kushtetueses: Tani koha për zbatimin e reformës

Kryeministri Edi Rama ka komentuar sot vendimin e Gjykatës Kushtetuese, e cila rrëzoi kërkesën e Partisë Demokratike për ligjin e Veting-ut

“Sipas mediave Gjykata Kushtetuese rrëzon kërkesën e PD kundër Vetingut! E vonuan po s’e ndalën dot. Tani koha për të nisur zbatimin sa më parë! Të fillojmë spastrimin në Pallatin e Drejtësisë dhe të marrim datën për çeljen e negociatave për anëtarësim në BE #Rilindje? #Shqipëriae Gjeneratës Tjetër…”,- shkruan Edi Rama në një postim në Twitter.

Reagon PD/Respektojmë vendimin e Kushtetueses

Partia Demokratike ka pranuar vendimin e Gjykatës Kushtetuese për ligjin e Vettingut. Në një deklaratë për mediat, PD shprehet se vendimi do të respektohet. Por PD shpreh se shqetësimi kryesor mbetet përdorimi i këtij ligji nga Kryeministri, Edi Rama.

Deklarata e PD:

“Partia Demokratike respekton vendimin e Gjykatës Kushtetuese në lidhje me Ligjin e Vetingut dhe ripohon vendosmërinë e saj për spastrimin e sistemit të drejtësisë nga të korruptuarit dhe shërbëtorët politikë.

 Partia Demokratike mbetet njësoj e shqetësuar se ligji aktual do ta vendosë vetingun e gjyqtarëve dhe prokurorëve nën kontrollin e Kryeministrit.

 Kontrolli qeveritar i vetingut është njësoj i rrezikshëm pavarësisht se kush është kryeministër. Por në kushtet aktuale, kur kryeministër është Edi Rama i cili është i lidhur me krimin dhe është zhytur në korrupsion, kontrolli kryeministror i vettingut do ta thellojë korrupsionin dhe kapjen e drejtësisë nga politika”.

NJOFTIMI I GJYKATËS KUSHTETUESE

Gjykata Kushtetuese e Republikës së Shqipërisë, sot, në datën 22.12.2016, mori në shqyrtim çështjen me palë:

Kërkues:  Jo më pak se një e pesta e deputetëve të Kuvendit të Shqipërisë, anëtarë të Grupit Parlamentar të Partisë Demokratike

Subjekte të interesuara:  Kuvendi i Republikës së Shqipërisë, Unioni i Gjyqtarëve të Shqipërisë

Objekti: -Shfuqizimi si i papajtueshëm me Kushtetutën e Republikës së Shqipërisë i ligjit nr.84/2016, datë 30.08.2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”.

-Pezullimi i zbatimit të ligjit nr.84/2016, datë 30.08.2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”.

Pasi shqyrtoi dhe analizoi pretendimet e paraqitura nga kërkuesi, si dhe parashtrimet e subjekteve të interesuara Kuvendi i Republikës së Shqipërisë dhe Unioni i Gjyqtarëve të Shqipërisë, në mbështetje të neneve 131/a dhe 134/1/c të Kushtetutës, si dhe të neneve 49, 51, 51/a, 26, 72 e vijues të ligjit nr.8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë, (i ndryshuar) 

VENDOSI:

– Rrëzimin e kërkesës.

SHBA: Partitë politike të respektojnë vendimin e Kushtetueses!

Pas vendimit të Gjykatës Kushtetuese për të mos bllokuar ligjin e Vetting-ut, duke rrëzuar kështu kërkesën e PD-së, ka reaguar Ambasada Amerikane në Tiranë.

Përmes një deklarate të shkurtër, përshëndetet vendimi i Kushtetueses dhe i bëhet thirrje të gjitha partive ta respektojnë këtë vendim. Më poshtë deklarata e plotë e ambasadë së SHBA-ve:

“Ambasada e SHBA në Tiranë mirëpret vendimin e Gjykatës Kushtetuese për ligjin e vetingut. I bëjmë thirrje të gjitha partive politike të respektojnë vendimin e Gjykatës. Gjithashtu, nxisim udhëheqësit shqiptarë të punojnë me shpejtësi për të zbatuar të gjitha reformat historike të sistemit të drejtësisë në Shqipëri. Një reformë kuptimplotë që i largon gjykatësit dhe prokurorët e korruptuar nga sistemi gjyqësor gëzon mbështetjen e publikut të gjerë dhe është një prioritet kryesor i Shteteve të Bashkuara në Shqipëri”,- njofton Ambasada e SHBA.

BE: Mbështetje për proces të plotë verifikimi për gjyqtarët

Delegacioni i Bashkimit Evropian e konsideron lajm të mirë vendimin e Gjykatës Kushtetuese për të shpallur ligjin e Vettingut në përputhje me Kushtetutën shqiptare. Me anë të një reagimi, BE-ja inkurajon autoritetet shqiptare që të fillojnë sa më shpejt zbatimin e ligjit për vlerësimin e gjyqtarëve dhe të prokurorëve. “Bashkimi Evropian i inkurajon autoritetet shqiptare të nisin me shpejtësi zbatimin e vlerësimit të gjyqtarëve dhe prokurorëve. Kjo është thelbësore për përparimin e procesit të anëtarësimit të Shqipërisë në BE dhe është pritur gjatë nga qytetarët shqiptarë, thuhet në reagim. Në deklaratë thuhet se Komisioni Evropian do ta mbështesë Shqipërinë për kryerjen e një procesi Vetingu tërësor dhe të besueshëm, duke udhëhequr Operacionin Ndërkombëtar të Monitorimit.

 Xhafaj: Fitore kush mbështeti ligjin, dështim për kundërshtarët

Kryetari i Komisionit të Posaçëm për reformën në drejtësi, Fatmir Xhafaj, në një intervistë për Ora News komentoi vendimin e Gjykatës Kushtetuese për ligjin e Vettingut.

Ai tha se ky vendim për të rrëzuar pretendimet e PD është një fitore për ata që mbështesin ligjin dhe një dështim për kundërshtarët e këtij ligji.

“E konsideroj një lajm të mirë, një lajm të mirë për aprovimin e sistemit. Është hequr një pengesë nga procesi i reformws. Për shkak se kjo ishte një betejat e radhës në gjithë këtë rrugëtim të reformës dhe është hapur rruga për të vazhduar me tej me vettingun. Është një fitore e të gjithë atyre që mbështetën fuqishim këtë proces në mënyrë të vecantë ligjin e vettingut dhe është dështimi që e kanë kundërshtuar këtë proces dhe kanë bërë përpjkejet nën dhe mbi tavolinë për ta frenuar. Është një dështim i merituar. Besoj se gjerat do të ecin normalisht. E di që do të ketë edhe vështirësi të tjera. Kam besim të plotë që gjërat do ecin mbarë”,- tha Xhafaj.

I pyetur se kur mund të fillojnë efektet e vettingut, Xhafaj tha se “Do zbatohen të gjitha procedurat, procedurat e para  duhe ti bëjë presidenti, gjyqtarët për të cilat ka afat të mirëpërcaktuara në ankesin kushtetues”.