Hantavirusi, ISHP del me deklaratë: Shqipëria e paprekur. Europa shihet me risk shumë të ulët

Instituti i Shëndetit Publik ka siguruar qytetarët se në Shqipëri nuk është regjistruar asnjë rast me Hantavirus dhe se aktualisht nuk ka arsye për shqetësim. Sipas ekspertëve të ISHP-së, rreziku që virusi të përhapet në vendin tonë apo në Europë konsiderohet shumë i ulët.

Epidemiologu Artan Simaku deklaroi se nuk ekziston asnjë kufizim për udhëtimet apo tregtinë, si për qytetarët shqiptarë ashtu edhe për ata europianë. Ai shpjegoi se vlerësimi bazohet në faktin që brejtësi që bart virusin Andes – lloji i identifikuar në anijen turistike ku u raportua shpërthimi – nuk gjendet në Shqipëri dhe as në kontinentin europian.

Sipas specialistëve, Hantaviruset përbëjnë një grup virusesh, por varianti Andes transmetohet nga njeriu tek njeriu vetëm përmes kontakteve shumë të afërta dhe të zgjatura familjare. Ndërkohë, format e tjera të Hantavirusit që mund të qarkullojnë në Shqipëri nuk përhapen mes njerëzve.

Autoritetet shëndetësore bëjnë të ditur se sistemi shëndetësor shqiptar mbetet në gatishmëri, me masa të posaçme për identifikimin e rasteve të dyshuara, izolimin e tyre dhe monitorimin e kontakteve.