Kryeministri Edi Rama ka reaguar sërish për pagat e gjyqtarëve, pak orë pas deklaratës së tij të mëparshme për pagat e magjistratëve.
Përmes një postimi në platformën X, Rama ka publikuar të dhëna të tjera për nivelin e pagave në sistemin gjyqësor, duke kundërshtuar rritjen e kërkuar nga gjyqtarët.
Sipas Ramës, paga mesatare e gjyqtarëve në Shqipëri është aktualisht 280% më e lartë se paga mesatare në administratën shtetërore. Ai thotë gjithashtu se gjyqtarët shqiptarë paguhen rreth 60% më shumë se kolegët e tyre në Malin e Zi dhe Maqedoninë e Veriut, ndërsa pagat janë më të larta edhe krahasuar me Kroacinë, Bullgarinë dhe Serbinë.
Kryeministri pretendon se, nëse do të miratohej rritja e kërkuar, paga mesatare e gjyqtarëve do të kalonte nivelin e pagave në Greqi, Rumani dhe Slloveni. Sipas tij, diferenca me Malin e Zi dhe Maqedoninë e Veriut do të arrinte në 140%, ndërsa krahasuar me administratën shqiptare do të shkonte në 470%.
Rama ndalet edhe te raporti mes pagave të gjyqtarëve dhe pagave të drejtuesve të lartë të shtetit. Ai thotë se, me rritjen e kërkuar, paga mesatare e gjyqtarëve do të ishte rreth 1 mijë euro më e lartë se ajo e Presidentit dhe 2 mijë e 200 euro më e lartë se paga e një ministri.
Kryeministri sjell në vëmendje edhe nivelin më të lartë të pagave në sistemin gjyqësor. Sipas tij, aktualisht kjo pagë është rreth 2 mijë euro më e lartë se ajo e Presidentit dhe 3 mijë euro mbi pagën e ministrit, ndërsa pas rritjes së kërkuar diferenca do të shkonte mbi 5 mijë euro me Presidentin dhe 6 mijë e 300 euro me ministrin.
Në përfundim, Rama e lidh debatin për pagat me kallëzimin penal të bërë nga shoqatat e gjyqtarëve ndaj Ministrit të Financave dhe drejtuesve të thesarit në vend.
Ai pretendon se kallëzimi lidhet me mosdhënien e shumave të kërkuara nga gjyqtarët, duke ngritur pyetjen nëse këto pagesa mund të kryhen pa një vendim të Parlamentit.