Ilir Meta tha tek emisioni “Opinion” i Blendi Fevziut se pa asnjë diskutim votat e LSI do të jenë për Reformën në Drejtësi. Ndërkohë Meta theksoi se unë kam dhënë fjalën në Washington dhe e mbaj, por duhet të insistojmë me çdo kusht që të jetë edhe opozita dakort.

Ilir Meta: Jam i bindur se jemi shumë pranë arritjes se marrëveshjes. Drafti që është diskutuar është ai hibrid. Më 21 korrik LSI do ta votojë draftin. Nëse reforma në drejtësi do votohet pa konsensus rrëzikohen të deligjitimohen institucionet e reja. 

Deklaratat Meta i bëri në studion e “Opinion” pas deklaratës së bërë nga kreu i opozitës, Lulzim Basha, se thëniet e Ramës ishin në të kundërt të asaj për të cilën u bisedua në pasdite.

“Votat e LSI do të jenë gjithmonë aty. Nëse politikanët bëjnë ndonjë lojë të papranueshme atëherë unë do kontaktoj që nesë me Flackenstein Lu dhe Nuland që ata të ndërhyjnë.

Cilido që tenton të poshtërojë opozitën, po bën një faj të madh. Kjo duhet të jetë histori suksese dhe jo histori elektorale se do të ketë pasoja. Deklarata e Ramës nuk është një thirrje dhe kontribut për konsensus. Opozita për fat të mirë nuk bëri gabimin si me reformën territoriale.

Mund tu them juve se në rast se reforma nuk miratohet me konsensus, votat e LSI-së do të jenë atje dhe ky do të jetë një dështim për 4 aktorët e tjerë, dhe në këtë drejtim do të ftoja BE-në dhe SHBA-në për zgjidhjen konsensuale dhe në fund fare në rast se politikanët shqiptarë bëjnë dhe lojë, se në rastin konkret është e pranueshme është e domosdoshme që këta ambasadorë të nderuar të bëjnë çdo gjë në lidhjen e qëndrimeve të zonjës Nuland.

Përgjegjësinë do ta mbajnë të gjithë ata që nuk bëjnë përpjekjet maksimale që kjo reformë të kalojë me konsensus.

Nëse nuk gjejnë konsensus bëjnë një faj të madh, të cilin do ta paguajnë qytetarët shqiptarë. Unë e kam bërë të qartë që nuk do komunikoj me asnjë deputet përveç grupit parlamentar të LSI, se e di ti pastaj thonë i mori Meta. Ky është një moment historik që nuk duhet kthyer në një histori elektorale”, u shpreh Meta.

Ja intervista e plotë e Ilir Metës

Duket se reforma në drejtësi ka qenë kryefjala. Sot pasdite, ju jeni takuar në zyrat e Kuvendit të Shqipërisë së bashku me kreun e Partisë Socialiste dhe me kreun e Partisë Demokratike dhe keni mandatuar tre ekspertë, të cilët janë duke punuar edhe në këto momente. Sipas informacioneve që kam unë, duket se diskutimet po shkojnë mirë. Kjo do të thotë se keni rënë dakord në parim që të kalojë apo të mos kalojë reforma në drejtësi?

Besoj se reforma në drejtësi do të kalojë dhe angazhimi im ka qenë dhe do të mbetet deri në fund që kjo reformë të kalojë me konsensus…

Kjo reformë do të kalojë me bindje, apo është një përfundim që vjen nga bisedimet e sotme?

Së pari, këtë e kam pasur një bindje prej kohësh. M’u lëkund pak javë më parë, por pas takimit të sotëm me Kryeministrin Rama dhe me kryetarin e opozitës, zotin Basha, jam shumë i bindur se jemi shumë pranë konsensusit për reformën në drejtësi.

Thatë që iu është rikthyer bindja që reforma në drejtësi do të kalojë pas takimit të sotëm. Duhet të përzinit z. Lu dhe znj. Vlahutin që të arrinit në përfundimin se reforma do të kalojë, se, për sa kohë, ishin ata në takime nuk kalonte? Do të kalojë drafti hibrid, i propozuar nga ndërkombëtarët apo ndonjë draft që është rakorduar ndërmjet jush, z. Rama dhe z. Basha?

Jo, drafti që është diskutuar është ai hibrid dhe unë besoj se ai draft, bazuar edhe në qëndrimet publike të zonjës Nuland dhe qëndrimet e sotme publike të zotit Flekenshtajn, i cili erdhi edhe në emër të raporterit tjetër të Parlamentit Europian, pra të grupit të djathtë të Partive Popullore Europiane, të zotit Kukan, është tërësisht i mundshëm për t’ua arritur konsensusi.

Atëherë, çfarë diskutojnë? Një “po” dhe një “jo” është, çfarë diskutojnë ekspertët që kanë katër orë që janë mbyllur dhe çfarë diskutuat ju për dy orë?

Unë mendoj se, duke pasur parasysh frymën pozitive të takimit të sotëm, nëse z. Flekenshtajn me zotin Kukan do të ishin angazhuar vetëm një fundjavë pas rekomandimeve finale të “Venecias”, kjo çështje do të ishte zgjidhur dhe tani reforma do të kishte filluar të implementohej. Pra, mendoj se ka qenë më shumë një atmosferë komunikimi…

Keqkuptim…

… pak telefon i prishur dhe një frymë…

Pse në këtë pikë është politika shqiptare, z. Meta, që punon telefon i prishur dhe nuk kuptohet, mjafton të vijë një ndërkombëtar për dy orë, të kthejë dhe t’ju bindë sesi duhet votuar?

Kjo pa dyshim që është një përgjegjësi e politikës shqiptare, e cila duhet të marrë më shumë përgjegjësi dhe unë besoj se edhe takimi i sotëm është një rast i mirë për ta demonstruar këtë përgjegjshmëri.

Kryeministri i vendit dhe kreu i PS-së nuk m’u duk se ruante të njëjtën qetësi si ju. Ai është shprehur “pak kohë na ndan nga një moment, që uroj të jetë momenti i bashkimit të të gjithëve, por që mund të jetë edhe momenti dramatik i një ndarjeje të re. Pra, ndarje mes atyre që janë të vetëdijshëm në atë Parlament pse janë aty dhe që përfaqësojnë ambicien e popullit për t’u çliruar nga kthetrat e atyre që po bëjnë çmos për të mos e lejuar të ndodhë ky transformim kolosal. Kam përshtypjen se kjo lloj gjuhe është e ndryshme nga ajo gjuhë që po përdorni ju, bashkëpunim, po e gjejmë atë, ishte një keqkuptim. Kryeministri është i qartë. Ai thotë se përfaqësojnë ambicien aty, bëjnë çmos për të mos e lejuar të ndodhë ky transformim kolosal. Pra, Kryeministri nuk flet për keqkuptim, por flet për platformë, për pengimin e reformës në drejtësi…

Unë mendoj se Kryeministri ka qenë shumë i qartë kohët e fundit. Ai ka thënë se opozita duhet ta zgjidhë këtë çështje me SHBA-në dhe me BE-në. Dhe nga pretendimet e sotme të opozitës unë besoj se nuk ka asnjë arsye për të mos u arritur konsensusi, pasi ato çështje që mbeten janë tërësisht në një linjë me qëndrimet publike të znj. Nuland, Ndihmës Sekretares së Shtetit dhe të z. Fleckenstein, që erdhi sot posaçërisht për këtë çështje.

Pra, e thënë ndryshe, z. Meta, ju, Basha dhe Rama jeni dakordësuar në parim sot për ta kaluar reformën në datën 21 korrik?

Natyrisht që vullneti për këtë çështje nuk diskutohet.

Por vullneti është po ose jo, se këtu nuk po shpikim ndonjë gjë të madhe. Është një draft i propozuar nga znj. Nuland për të cilin keni diskutuar. Mund ta di se çfarë ju pengon të thoni po për draftin e znj. Nuland?

Votat e LSI-së janë prej kohësh në Uashington, por nuk është ky problemi.

Si janë në Uashington? Që do të thotë se në datën 21 korrik, 20 votat e LSI-së do të jenë në favor të draftit apo jo, pavarësisht votimit të të tjerëve?

Padyshim që do të jenë në favor të draftit, por porosia që kam marrë unë nga Uashingtoni është që të bëj çdo përpjekje për konsensus dhe kjo është shumë e rëndësishme.

Nëse konsensusi dështon, 20 votat tuaja do të jenë pro reformës?

Nuk ka asnjë arsye që konsensusi të dështojë, vetëm në rast se e provokojmë ne konsensusin, siç dhe ka ndodhur, për fat të keq, këto kohë.

Edhe kjo ndodh rëndom në politikën shqiptare. Pyetja është e drejtpërdrejtë…

Nuk do të ndodhë kjo.

Në rast se opozita vendos të mos e kalojë këtë draft, ju, si Lëvizja Socialiste për Integrim do të votoni pro apo kundër këtij drafti?

Pyetja nuk ka nevojë të jetë e drejtpërdrejtë, sepse përgjigja është dhënë prej kohësh, pa dyshim që ne do ta votojmë.

Do ta votoni?

Padyshim që do ta votojmë, sepse drafti aktual është një draft i cili përputhet plotësisht me rekomandimet finale të Venecias. Pretendimet aktuale të opozitës unë mendoj që janë të drejta dhe askush nuk mund t’i kontestojë ato. Këtu diskutimi bëhet për disa modifikime, të cilat nuk kanë asnjë arsye…

Që e prekin thelbin apo nuk e prekin?

Absolutisht, nuk e besoj se e prekin thelbin. Po punohet aktualisht edhe me ekspertët e OPDAT-it dhe me ata të EURALIUS-it për të gjetur dakordësimet e fundit. Por ajo që dua të them unë është se nuk është problemi që reforma të kalojë me 94 vota, apo me 95 vota, sepse kjo është një reformë shumë e madhe, një ribërje e Kushtetutës së Shqipërisë. Është një reformë, e cila, për fat të keq, është zhvilluar në një atmosferë jo shumë demokratike, në një atmosferë jo shumë konstruktive ku ka dominuar retorika e ashpër, shantazhuese, ndarëse dhe ku njerëzit ende sot, jo vetëm qytetarët, por, për fat të keq, edhe deputetë, që do të votojnë ditën e enjte nuk janë të qartë për shumë çështje të tjera, të cilat janë shumë të rëndësishme për të ardhmen. Nuk bëhet fjalë për një reformë për zgjedhjet e ardhshme, por bëhet fjalë për një reformë, e cila do t’i shërbejë Shqipërisë të paktën për 30 vjetët që vijnë.

Por, z. Meta, megjithëse këta deputetë nuk janë të qartë, meqenëse votat e PS-së i garantoi Kryeministri në një fjalim të sotëm, ju po i garantoni këtu live në studio votat e LSI-së, me çfarë të drejte ka dalë Kryeministri, ose të paktën kreu i maxhorancës të mbledhë votat e opozitës për këtë reformë, kur as deputetët nuk e kanë të qartë se për çfarë po votojnë?

Nuk mendoj se nuk e kanë të qartë thelbin e reformës, por kanë të paqartë ende çështje të caktuara dhe më e rëndësishmja, opinioni publik mund të kishte më shumë informacion, sepse mendoj se kjo është një reformë që është në interes të të gjithë shqiptarëve, nuk është një reformë që bëhet thjesht për politikanët, zyrtarët e kështu me radhë.

Të kërkosh votat e deputetëve të veçuar, z. Meta, a është trafikim votash? A është blerje votash? Është një proces, po e quaj, moralisht i qëndrueshëm demokraci?

Unë nuk i hyj kësaj çështjeje sot. Ai shqetësim që kam pasur në fillim dhe që ende e kam, por besoj se jemi pranë suksesit, është që në rast se reforma në drejtësi, reforma kushtetuese, që ne do të votojmë ditën e enjte, do të votohet pa konsensus, atëherë i gjithë procesi i mëtejshëm i integrimit europian të vendit, jo vetëm që vihet në diskutim, sepse rrezikohet, minohet dialogu politik, një kusht i domosdoshëm për vazhdimin e procesit të integrimit, por njëkohësisht rrezikohet të deligjitimohen ose të kontestohen institucionet e reja dhe i gjithë ky proces për të cilin besueshmëria është mjaft e rëndësishme.

Të mos harrojmë që z. Krichbaum, kryetari i Komisionit për Çështjet Europiane në Bundestagun gjerman, deklaroi se një reformë drejtësie, e cila votohet në mënyrë të njëanshme, nuk mund të prodhojë një drejtësi të besueshme dhe të pavarur.

Kryeministri e ka deklaruar publikisht vullnetin e tij dhe të votave të tij në favor të reformës në drejtësi, megjithëse, me sa di unë, më shumë këto ditë janë shqetësuar për votat për qeverinë se për votat për drejtësinë. Ju sapo i deklaruat tani votat në favor të reformës në drejtësi, mbetet që topi t’i mbetet vetëm opozitës që të thotë po ose jo. Në këtë rast, pavarësisht se cili do të jetë qëndrimi i opozitës, në datën 21 korrik jeni i sigurt që do të votohet ky draft?

Realisht topi në çdo rast na mbetet të gjithëve, sepse ky duhet të jetë një produkt i të gjithëve dhe duhet të jetë një histori suksesi e të gjithë aktorëve politikë në vend, por aktualisht mendoj se diskutimi kryesor është me përfaqësuesit e BE-së dhe të Shteteve të Bashkuara, pasi Kryeministri e ka bërë të qartë që është dakord me gjithçka që ata konfirmojnë.

1. Meta, pyetja lidhet më shumë me pjesën konkrete, që do të thotë në datën 21 korrik, do të votohet drafti, apo jo?

Padyshim, ne besojmë që do të votohet…

Nuk ka për të pasur shtyrje tjetër?

Nuk besoj se ka arsye, sepse problematika që ka mbetur për t’u dakordësuar, mendoj se është shumë e thjeshtë.

Ju tremb personalisht ju, z. Meta, reforma në drejtësi? A keni frikë ju nga një drejtësi ndryshe nga kjo që është deri tani? Në fjalën tuaj, ka bërë përshtypje fakti se fjalën “burg” e keni përmendur 11 herë. Kaq frikë keni realisht nga burgu pas reformës në drejtësi?

Së pari, të jeni i sigurt që jam më i qetë se kushdo tjetër për reformën në drejtësi.

Së dyti, Lëvizja Socialiste për Integrim është një forcë politike, e cila nuk ka pasur asnjë arsye të mbrojë sistemin aktual. Përkundrazi, ka qenë mjaft mbështetëse për një ndryshim të thellë dhe të plotë të sistemit aktual të drejtësisë, ashtu sikurse nuk ka asnjë arsye dhe asnjë shqetësim për të kapur sistemin e ri.

I vetmi angazhim dhe preokupim imi dhe i Lëvizjes Socialiste për Integrim mbetet stabilitetit i vendit dhe forcimi i institucioneve në vend.

Unë vazhdimisht gjatë gjithë kësaj periudhe kam qenë i angazhuar në këtë drejtim, duke e bërë të qartë që ne nuk duhet të lejojmë një situatë në Shqipëri si ajo në Maqedoni, në kuptim të ngërçit institucional dhe të krizës politike, e cila nuk po zgjidhet edhe pse ka një 1 vit që janë angazhuar zyrtarë nga më të lartët të Europës dhe të Shteteve të Bashkuara.

1. Meta, kaq keq janë raportet tuaja me SHBA-të dhe Uashingtonin? E përmendët vetë në fjalën tuaj. Ndërkohë ka rënë vazhdimisht në sy fakti që znj. Nuland, kur ka ardhur në Shqipëri, nuk ju ka takuar, megjithëse ju jeni faktor i rëndësishëm dhe përfaqësoni një nga tri forcat kryesore politike, ose ka shmangur takimet me ju.

Unë nuk e di nëse znj. Nuland ka shmangur ndonjë takim me mua dhe nuk e di pse duhet të takohet patjetër me mua, sepse unë jam Kryetari i Kuvendit të Shqipërisë…

Kryetari i Lëvizjes Socialiste për Integrim që ka rëndësi të japë vota për reformën në drejtësi…

Po, patjetër.

Përderisa ka ardhur për reformën në drejtësi…

Unë çështjen e angazhimit të LSI-së e kam sqaruar prej kohësh në Departamentin Amerikan të Drejtësisë dhe në mënyrë të veçantë me ndihmës- Sekretarin e Shtetit, pra Departamentin e Shtetit që merret pikërisht, që mbulon programet e drejtësisë, të antikorrupsionit, të antidrogës e kështu me radhë, ambasadorin Brownfield, i cili më ka kërkuar të angazhohem sa më fuqimisht që kjo reformë të përfundojë brenda korrikut, për shumë arsye, për të konkretizuar edhe mbështetjen dhe ndihmën financiare të Shteteve të Bashkuara për institucionet e reja që do të dalin nga kjo reformë dhe njëkohësisht në këtë drejtim unë jam i bindur që marrëdhëniet e mia me Shtetet e Bashkuara kanë qenë dhe janë të shkëlqyera. Në qoftë se ju keni ndonjë shqetësim tjetër…?

1. Meta, a ka pasur një marrëveshje mes jush dhe zotit Berisha për të penguar reformën në drejtësi, ose mes jush dhe zotit Basha? Kam përshtypjen që ju më shumë keni hedhur idenë se zoti Basha ka pasur një “feeling” në distancë me z. Rama për t’ju nxjerrë nga politika ju dhe zotin Berisha.

Së pari, njëherë lidhur me çështjen e këtyre problemeve për të penguar reformën në drejtësi, të frikës nga burgu, të raporteve me amerikanët, duhet t’ju sqaroj që ia kam bërë të qartë ambasadorit Lu, i cili ka shumë konsideratë për mua, të paktën kështu del nga takimet tona, që në rast se ky është lloji i politikanit që jam unë, në raport me Shtetet e Bashkuara të Amerikës, nëse FBI-ja, DEA, CIA, të gjitha këto agjenci të Shteteve të Bashkuara të Amerikës, kanë edhe një gjë fare të vogël për Ilir Metën, ai t’ua kërkojë të ma sjellin dhe unë iki vetë nga politika, sepse nuk do të doja që Shtetet e Bashkuara të Amerikës të kenë një partner si Ilir Meta në Shqipëri.

Nëse kanë gjë, do e çojnë në drejtësi zoti Meta, dhe vepron ligji, nuk ka nevojë t’jua bëjnë juve me dije dhe të largoheni ju me dëshirë.

Ajo është tjetër çështje. Ashtu sikur mund t’ju them që në çdo moment Ilir Meta ka qenë i hapur për Shtetet e Bashkuara dhe jo rastësisht, kur edhe ju u morët jo pak me çështjen CEZ-DIA, Ilir Meta deklaroi dhe tha që ishte i hapur që për këtë çështje të investigonte edhe FBI-ja.

Megjithatë…

Jo më kot.

… duket, z. Meta, se pikërisht që nga çështja DIA marrëdhëniet tuaja me Kryeministrin janë ftohur mjaft dhe vendi praktikisht, nuk e di se çfarë mund të mendoni ju, është bërë i paqeverisshëm nga kjo maxhorancë.

Unë nuk ndaj të njëjtin mendim me ju. Marrëdhëniet e mia kanë qenë gjithmonë korrekte edhe me Kryeministrin Rama, sepse unë jam korrekt në çdo marrëdhënie.

Sapo mora një mesazh nga një anëtar i PS-së, në fakt ka qenë edhe kandidat për kryetar, z. Eduard Ndocaj, i cili thotë se ka ndërmarrë një nismë me firma për të rrëzuar puçistin Meta. “Ilir Meta, – thotë, – na ka bërë një nder të madh, ai na ka hequr mundësinë për ta çuar përpara gjykatës, sepse ka shprehur vetë vullnetin e tij për të shkuar në burg. Ky është rasti i parë në politikën shqiptare që një politikan e dënon veten për veprat që ka bërë. Më pas ai thotë se LSI-ja më në fund do të ketë mundësinë të dalë në opozitë dhe të mos vjedhë më dhe të mos zhvatë qytetarët. Qytetarët shqiptarë duhet të dalin në sheshe për të festuar largimin e kleptomanisë. Unë ju bëj thirrje të gjithë deputetëve socialistë të dalin sa më shpejtë nga koalicioni, madje që sot do të nis iniciativën e mbledhjes së firmave brenda Grupit Parlamentar të PS-së për të larguar LSI-në dhe Ilir Metën nga koalicioni qeverisës.” Kaq keq kanë mbërritur raportet tuaja me PS-në, z. Meta?

Unë nuk e njoh fare se kush është ky zotëri.

Deputet i Partisë Socialiste, një njeri që do të votojë reformën në drejtësi në datën 21 së bashku me ju… dhe do t’i shërbejë vendit. Ndërkohë që ju keni qenë mjaft i ashpër në raport me koalicionin dhe me qëndrimin tuaj.

Nuk e kam parasysh.

1. Meta, ju thoni se pas miratimit të reformës, që lë të kuptohet se, nëse nuk miratohet reforma, të shkojmë në një qeveri teknike. Pse keni arritur në këtë përfundim? Ishte deklaratë serioze, apo ishte thjesht një presion  ndaj Ramës,  siç u shpreh një pjesë e medieve sot?

Pse presion ndaj Ramës?

Ka një pjesë të medieve, edhe brenda PS-së, që thonë: “Është thjesht  një presion i Metës për të rinegociuar marrëveshjen për të bërë ndryshime  brenda  qeverisë për të larguar persona që ai nuk i do dhe për të vazhduar  më pas  deri në vitin 2017, madje dhe një presion për të marrë postin e Presidentit në zgjedhjet e  ardhshme”. Pra, thjesht një goditje në derë që të dëgjojë  ai që është brenda.

Nëse edhe ju keni këtë perceptim…

Unë po citoj burime…

Ah burime, të paidentifikuara, dakord. Janë serioze.

Pa dyshim, janë burime serioze, burime mediatike, që thoshin  se është presioni i radhës i Ilir Metës, sepse  nuk e ka seriozisht  largimin e qeverisë dhe krijimin e një qeverie teknike.

Atëherë ky ishte një mesazh për të gjithë ata  që e kanë seriozisht reformën në drejtësi dhe që duan patjetër që ajo të realizohet. Iniciativa ime për t’i ftuar të pesë aktorët, ose të katër aktorët, ishte si kryetar i parlamentit, sepse në fund fare  kemi edhe procedurat parlamentare, për të cilat unë kam përgjegjësinë time dhe që  duhet të jenë korrekte, sepse kemi të bëjmë me ndryshime  kushtetuese. Kjo kishte të bënte me faktin  që nuk po gjendej një zgjidhje. Kemi një reagim të z.  Rama, i cili thotë që z. Basha të negociojë me SHBA-në dhe me BE-në, kemi një reagim të ambasadorit amerikan z. Lu, që z. Rama dhe z. Basha të takohen ditën e hënë me njërit-tjetrin, duke përjashtuar propozimin e Partisë Demokratike, që ishte i papranueshëm e  të tjera për SHBA-në dhe të rrinin dhe ta zgjidhnin këtë çështje.

Madje deklarata e ambasadorit  ishte tejet  e  ashpër edhe për një ambasador. Ai tha: “Nëse nuk e zgjidhin, të qëndrojnë  të mbyllur përjetë në atë dhomë”.

Mendoj se është e drejta e ambasadorit t’i bëjë deklaratat  ashtu sikurse ai  e çmon.

Ishte  e ashpër si deklaratë për një ambasador?

Për mua  është e rëndësishme që  të bëhen veprime që zgjidhin  problemet, pastaj çështja  e deklaratave varet nga gjykimi dhe vlerësimi i secilit, por  për rastin konkret, duke  parë reagimet edhe të z. Rama, edhe të z. Basha dhe faktin që po përfundon koha për të shkuar drejt një votimi dhe ky është një votim shumë i rëndësishëm për Shqipërinë sipas meje, jo për zgjedhjet e  ardhshme, por për 30 vjetët e ardhshëm, unë gjykova se kishte  ardhur momenti të bënim përpjekjen e fundit për të takuar të gjithë aktorët në mënyrë që të sqaronim çdo diferencë apo të kuptonim se ku po shkonim. Unë kam kërkuar prej kohësh një takim të aktorëve kryesorë politikë dhe  përfaqësuesve të partnerëve ndërkombëtarë menjëherë pas rekomandimeve  finale të Komisionit të Venecias  pasi besoja  se kjo ishte   rruga më e mirë për të vendosur përfundimisht shinat e paketës kushtetuese dhe kjo gjë nuk ndodhi atëherë.

Sapo ka reaguar z. Basha, i cili është përgjigjur, në fakt, pas takimit tuaj që ju  e quajtët konstruktiv, siç e  quan, në fakt, edhe z. Basha. Ka  reaguar ndaj fjalimit të z. Rama. Ai thotë: “Predikimi  i gjatë duke fryrë tullumbacen e madhe të mashtrimit, ishte një dëshmi  e freskët se sa  e do reformën në drejtësi Edi Rama. Ka një përpjekje për ta hequr Reformën në Drejtësi nga tryeza ku po negociohet dhe ku u ra dakord për pak orë më parë dhe nga ai që negociohet. Një përpjekje për ta hequr nga tryeza e zgjidhjes dhe për ta shtruar në tavolinën e ushqimit të tij të përditshëm politik, që është sulmi dhe provokimi ndaj opozitës. Ky shfrim vërteton edhe një herë nevojën akute për argumente elektorale që ka Kryeministri me bilancin e keq të këtyre 20 vjetëve. Edhe Basha sapo ka deklaruar që Rama ka mbajtur një qëndrim të ndryshëm nga ai që ka mbajtur në tavolinës. Po dështon takimi juaj, z. Meta?

Atëherë mund t’ju them se në rast se reforma nuk do të miratohet me konsensus, votat e LSI-së do të jenë atje dhe ky do të jetë një dështim për katër aktorët e tjerë. Në këtë drejtim, unë do të ftoja sidomos ambasadoren e BE-së dhe ambasadorin e Shteteve të Bashkuara, që të bëjnë të gjitha përpjekjet për zgjidhje konsensuale, sepse janë të gjitha mundësitë për këtë zgjidhje. Në fund fare, në rast se politikanët shqiptarë bëjnë edhe ndonjë lojë politike, që në rastin konkret është e papranueshme, sepse kemi të bëjmë me drejtësinë e shqiptarëve, jo të politikanëve, për 30 vjetët që vijnë dhe jo për zgjedhjet e ardhshme, është e domosdoshme që këta ambasadorë të nderuar që përfaqësojnë dy partnerët tanë  kryesor, të bëjnë çdo gjë në linjën e qëndrimeve të znj. Nuland dhe të z. Fleckenstein sot. Në rast se do të ketë probleme, unë do të komunikoj si me z. Fleckestein dhe z. Kukan, ashtu edhe me aktorë të tjerë duke filluar nga dita e nesërme. Përgjegjësinë do ta mbajnë të gjithë ata që nuk bëjnë përpjekjet maksimale që kjo reformë të kalojë me konsensus, sepse nuk ka asnjë arsye. Cilido që provokon apo që përpiqet të poshtërojë edhe opozitën për çështje të drejta të saj bën një faj të madh, sepse do ta paguajnë qytetarët shqiptarë, që nga konflikti politik që do të instalohet në vend, që nga vënia në diskutim e integritetit dhe legjitimitetit të kësaj reforme dhe deri te vështirësia e jashtëzakonshme për zbatimin e kësaj reforme.

Ndërkohë, z. Rama ka deklaruar sot se i ka 94 vota dhe e kam në sinkron. I keni gjetur këto vota, zoti Meta? Keni dalë me letër në dorë duke shënuar emra deputetësh, të cilët mund të bashkëngjiten?

Jo, jo. Unë e kam bërë të qartë që nuk do të komunikojë me asnjë deputet, përveç grupit parlamentar të Lëvizjes Socialistë për Integrim, sepse ti e di që pastaj thonë që i mori Meta. Apo jo? Ky është një moment mjaft i rëndësishëm dhe historik për vendin, i cili duhet të kthehet në histori suksesi dhe jo në një histori elektorale sepse do të jetë shumë e hidhur për të gjithë ata që do ta sabotojnë këtë konsensus.

1. Meta, ndërkohë keni thënë që pas miratimit të reformës, duke e quajtur të miratuar atë, por që kuptohet edhe nëse nuk miratohet, duhet shkuar në një qeveri teknike. I qëndroni ende kësaj?

Jo, nuk kam thënë kështu. Ja ky është keqkuptimi që ka ndodhur. Unë kam thënë se duhet të takohemi të gjithë, duhet të gjejmë patjetër një zgjidhje për datën 21, kam vlerësuar se nuk kemi të bëjmë thjesht me një aspekt të caktuar apo me një aspekt tjetër të elementeve të reformës, por kemi të bëjmë me  një mosbesim të madh për shkak të klimës konfliktuale se kush e do, kush është i ndershëm, kush është i pandershëm.

Nuk është normale që politikanët të shprehen për këtë çështje, pasi mendoj që Venecia është shprehur qartë dhe nuk mund të paragjykojmë vendimet e saj dhe ne, në të ardhmen nuk mund të bëjmë punën e drejtësisë. Jam distancuar nga e gjithë fryma në mënyrë të vazhdueshme, që hajdeni ju, jepni konsensusin, ose pse nuk jepni konsensusin ju, se ju do të shkoni në burg dhe se ne jemi më të mirë se ju, sepse kjo nuk është një frymë që na ndihmon për konsensus.

Në fakt, edhe deklarata, e kreut të PD-së thotë: “e tregoi edhe një herë se nuk do drejtësi, por shpëtim për veten e tij. Takohemi për konsensus si rruga e vetme për të votuar reformën. Ky, sa del nga takimi, trumbeton ndarjen e re të parlamentit e të politikës. E në cilën anë të ndarjes i bie të jetë ky që futi aty banditë, trafikantë droge, tutorë dhe vrasës? “Armando Prenga, që do ta thërrasë për të votuar të enjten reformën, në cilën ndarje bën pjesë?” – thotë. Pretendimi se i paskan 94 vota është një presion kriminal, krejt e kundërta e asaj që duhet të vihet në themelet e një reforme afatgjatë në drejtësi. Nuk i ka votat, thotë, sepse projekti “Rama” nuk ka qenë dhe nuk është reforma në drejtësi. Pra, Basha e quan shantazh, e quan provokim ndaj opozitës deklarimin e sotëm të 94 votave, nga kreu i PS-së.

Natyrisht, nuk është një thirrje dhe një kontribut për konsensus. Në mënyrë të vazhdueshme, gjatë gjithë këtij viti, që ka filluar procesi i reformës, kam bërë të qartë se sa e rëndësishme është që Shqipëria ta miratojë me konsensus reformën në drejtësi.

Dua të them se opozita, për fat të mirë, nuk bëri gabimin që bëri me reformën administrative territoriale, ku neve, edhe pse na duheshin më pak vota, pra 84, u treguam shumë herë më zemërgjerë, më të hapur…

Edhe aty me vota të trafikuara, z. Meta?

Jo, nuk ishin të trafikuara, sepse erdhi PDIU-ja.

Nuk i kishit 84 vota. Maxhoranca juaj ka pasur 83 vota.

Erdhi PDIU-ja. PDIU-ja ishte parti që kishte vota legjitime, e cila kontribuoi, bëri edhe ajo ca sugjerime të sajat, kështu që ishte plotësisht legjitime, por te reforma administrative territoriale ne ia dhamë të gjitha mundësitë opozitës. I dhamë pesë variante, kur ajo paragjykonte se ne kishim paravendosur një variant të vetëm, dhe në fund fare, zoti Fino dhe zoti Vasili vajtën edhe në konferencën e Partisë Demokratike për reformën, dhe u thanë: na jepni ju variantin tuaj, në qoftë se nuk  i pëlqeni këta ta pestë.

Ndërsa në rastin e reformës së drejtësisë, mendoj se është një klimë shumë e helmuar. Kjo është shumë e gabuar dhe e papranueshme, sepse kemi të bëjmë me një problem madhor për të gjithë qytetarët shqiptarë, dhe duhet të vihemi në vendin e opozitës.

Unë ia kam thënë vazhdimisht edhe z. Rama, të lutem, u kam thënë edhe kolegëve të tjerë socialistë, që të jemi sa më racionalë, të jemi sa më konstruktivë, dhe…

Ndërkohë, ka një kontradiktë mes publikut që kërkon reformën dhe politikës që s’e do reformën, zoti Meta?

Më fal, më fal! Nuk shikoj ndonjë që s’e do reformën. Absolutisht. Kërkesat e Partisë Demokratike kanë qenë plotësisht në përputhje me rekomandimet e Venecias. Një a dy diskutime që kanë mbetur, nuk tregojnë se nuk e do reformën. Përkundrazi.

Madje mund t’ju them edhe këtë, që Partia Demokratike ka qenë edhe më e avancuar për Byronë Kombëtare të Hetimit apo për Prokurorinë Speciale, të cilat do të merren në mënyrë të veçantë me korrupsionin e zyrtarëve.

Kthehemi  edhe një herë te qeveria. Pyetja është e drejtpërdrejtë: a ka mbaruar koalicioni PS-LSI? A ka marrë fund koalicioni juaj me Edi Ramën? A quhet një koalicion i dështuar, në këtë moment që po flasim bashkë, dhe a do të vazhdojë më tutje kjo bashkëqeverisje? 

Në rregull! Atë që unë thashë: “qeveri e ekspertëve”, dhe atë që z. Basha e quajti “qeveria teknike”. Kjo ide erdhi nga domosdoshmëria e miratimit të reformës, dhe me konsensus. Kjo ishte një ide krejtësisht imja, pasi problemi kryesor që ne kemi është dyshimi i opozitës se qeveria mund të përdorë instrumentet e saj për të kapur institucionet e reja të drejtësisë.

Duhet të jemi shumë të drejtë dhe shumë të ndershëm edhe me opozitën, aktualisht, sepse unë mendoj se opozita ka dhënë kontributin kryesor për kompromis. Pse? Dhe këtë ua kam thënë edhe partnerëve ndërkombëtarë, ia kam thënë edhe z. Rama. Sepse ne themi, ju mund të thoni, përfaqësues të maxhorancës aktuale, se ky sistem duhet ndryshuar, sepse ky sistem i korruptuar e të tjerë e të tjerë,  mbrohet nga Partia Demokratike, e kështu me radhë, për arsye se shumë emërime mund të jenë bërë në periudhën tetëvjeçare, kur PD-ja ka pasur shumicën në parlament.

Atëherë Partia Demokratike, normalisht, për arsye pragmatike apo edhe për arsye të kuptueshme, që kanë të bëjnë me shqetësimin për moskapjen e sistemit, normalisht do ta kishte apo jo shumë më komode për të vazhduar me sistemin aktual.

Partia Demokratike, me dëshirë apo pa dëshirë, apo me përgjegjësi, kjo nuk më mbetet mua ta gjykoj, ka pranuar një ndryshim total të sistemit të drejtësisë, madje ka dhënë disa nga propozimet më të  guximshme. Atëherë, kur kjo forcë politike, e cila është e interesuar që të mos ndryshojë ky sistem, pranon që të gjitha këto institucione të ndryshojnë, të rikompozohen, të bëhet edhe procesi i vetingut, nuk paska të drejtë që të kërkojë disa garanci, që sistemi i ardhshëm të mos kapet nga pala tjetër?! Kështu që, në këtë drejtim, unë besoj se duhen bërë të gjitha përpjekjet për ta mbyllur këtë si një histori suksesi të të gjithëve, sepse, në fakt, kjo ka nisur si një histori për të kërkuar fajtorë. Sepse kjo ka të bëjë me Shqipërinë.

A ka mbaruar koalicioni Rama – Meta? A jeni ju sot në koalicion me Edi Ramën?

Jo, kjo nuk ka lidhje.

A do të qëndrojnë ende ministrat e LSI-së, pas deklaratës suaj, në qeverisjen e vendit?

Atëherë ju nuk e keni kuptuar thelbin e propozimit tim. Qëllimi im ishte: meqenëse të gjithë e duan reformën, por Partia Demokratike mendon se qeveria aktuale “Rama-Meta”, do ta kapë këtë sistem, atëherë kjo mund të ishte një zgjidhje, që të votohej reforma në datën 21 korrik, dhe të bihej dakord për zgjedhjet të reja, në mënyrë që të miratohej reforma, sepse kjo ishte sfida dhe kërkesa kryesore.

Zgjedhje të lira dhe të parakohshme.

Të menjëhershëm apo të mëvonshme, nuk ka rëndësi. Jo vetëm kaq, por ideja ime ishte edhe për t’u bërë qeveri PS-PD dhe LSI-ja të kalonte në opozitë, në kuptimin e mirë të fjalës. Unë isha i gatshëm, si kryetar i LSI-së, të bënim çdo sakrificë. Do t’i referohem një thënie të socialistëve të dikurshëm: “Të sakrifikojmë pushtet për të bërë shtet”.

E cila nuk rezultoi kaq e suksesshme.

Jo, në 97-ën socialistët bënë çdo gjë për të  ndërtuar shtetin, edhe pse kishin 120 e ca mandate në parlamentin e atëhershëm, dhe u treguan shumë më tolerantë se sa po tregohemi ne sot, në një moment mjaft të rëndësishëm, ku duhet të demonstronim më shumë pjekuri politike dhe përgjegjësi edhe për paqen…

Nëse reforma kalon të enjten, duhet një qeveri teknike apo nuk duhet, z. Meta? Duhet të vazhdojë kjo aleancë, apo jo?

Unë dua të falënderoj z. Basha, i cili nuk u mor fare me këtë çështje dhe u përqendrua në dy-tre…

1. Basha ka përshëndetur vendimin tuaj për një qeveri teknike. E kam deklaratën e tij.

Po, e ka përshëndetur, por në  bisedën që ne kemi zhvilluar ai u përqendrua totalisht dhe vetëm te propozimi hibrid, në mënyrë që t’i japim një zgjidhje përfundimtare.

Duke hequr mënjanë z. Basha, a funksionon më marrëveshja juaj me Edi Ramën?

Po, patjetër që funksionon.

Si funksionon?

Kjo nuk kishte të bënte me raportin e LSI-së me PS-në, por që t’i japim një zgjidhje vendit.

Pra, ju jeni  që kjo qeverisje e zotit Rama me ministrat e LSI-së të vazhdojë?

Po, pa dyshim që ajo normalisht duhet të vazhdojë.

A do të përgatisni ju një mocion mosbesimi për Kryeministrin për ta rrëzuar atë z. Meta, siç flitet prej kohësh dhe siç komentohet në  medie?

Absolutisht.

A do t’i bashkonit votat ju me PD-në për të ndërtuar një qeveri teknike, e cila mund ta çojë vendin në zgjedhje të parakohshme brenda një afati kohor të shkurtër?  

Nuk ka asnjë arsye dhe  nuk e kuptoj se pse duhet të ndodhë kjo gjë.

Pra, aktualisht ju dhe z. Edi Rama jeni në “muaj mjalti” sërish  me njëri-tjetrin, sepse kam vënë re vazhdimisht sulme ndaj njëri- tjetrit, në mos publike “underground”, që do të thotë: a funksionon më marrëveshja juaj?

Nuk ka asnjë sulm nga ana ime. Unë i kam dhënë zoti Rama besim të plotë për të provuar aftësitë e tij si Kryeministër…

Si kanë qenë këto aftësi? 

Të lutem, meqenëse po flasim për integrimin europian të Shqipërisë, unë po ju them juve sot se, i kam thënë ambasadores Vlahutin, i kam thënë ambasadorit Lu për gati një vit dhe u kam thënë edhe shumë përfaqësuesve të tjerë europianë që pa konsensus, është e vështirë që Shqipëria të bëjë ndonjë hap para për integrimin  europian, mund të  bëjë hapa mbrapa, por hapa para, është shumë e vështirë, ashtu sikurse pa e votuar këtë reformë, pra nëse ajo reformë dështon, do të jetë përsëri një hap i madh mbrapa dhe në këtë drejtim. Unë insistoj të bëhen të gjitha përpjekjet për të realizuar konsensusin, sepse konsensusi është tërësisht i mundshëm dhe  ai mund të  ishte realizuar prej kohësh.

Nëse konsensusi realizohet, gjithçka do të vazhdojë  normalisht? Pra, do të ikni me pushime dhe do të vazhdoni normalisht? Nuk keni ndër mend  të tërhiqni  ministrat e LSI-së dhe ju të jepni dorëheqjen nga posti i Kryetarit të Kuvendit siç paralajmëruat?

Kjo  do të  bëhej për hir të miratimit të reformës në drejtësi, nëse do të  kishte një mirëkuptim.

Pra, z. Basha ju lë ta vazhdoni koalicionin. Po nëse zoti Basha ju kërkon nesër një qeveri teknike, a  jepni gati ta sakrifikoni  këtë  maxhorancë për hir të kërkesës së opozitës?

Dua t’ju them dy gjëra. Jam habitur kur jam takuar herën e parë me z. Basha, në takimin, i cili kishte të bënte me përpjekjen time për të marrë konsensusin e opozitës  për  të filluar  procedura normale dhe të pakontestueshme  në komisionin parlamentar për diskutimin e reformës, pasi ishte zhvilluar  një takim më përpara midis z. Basha dhe z. Rama dhe kishin mbetur disa çështje të  rëndësishme pa u zgjidhur apo pa u dakordësuar dhe ideja ime ishte për të fituar  kohë, pra për të kapur datën 21  korrik. Desha të merrja mirëkuptimin e tij dhe të opozitës që të ecnim përpara me kalendarin  dhe ndërkohë, të  negociohej për çështjet e tjera. Unë jam habitur nga konstruktiviteti i zotit Basha në atë takim. Kam vënë re që kërkesat  që ai kishte, i famshmi neni 88, ishte në thelb një kërkesë  tërësisht legjitime e opozitës.

Në emisionin  e fundit, në këtë studio, keni thënë se z. Basha gënjen edhe kur e pyet për orën, pra është një politikan të cilit s’i besoni. A keni ndërruar mendim, nuk po  ju gënjen më zoti Basha apo ndiheni më afër tij për momentin?

Unë po ju them  se në këto momente z. Basha po jep  një kontribut shumë të rëndësishëm për konsensusin.

Po z. Rama, po tenton ta  prishë këtë konsensus?

94 votat  nuk janë konsensus  dhe janë një problem i madh për Shqipërinë, jo vetëm për tani, por edhe për një kohë shumë të gjatë.

1. Ilir Meta, a do të vazhdojë qeverisja juaj deri në qershor të vitit 2017?

Patjetër, ne kemi një marrëveshje 4-vjeçare dhe nuk ka asnjë arsye pse të mos vazhdojë.

A është e dështuar qeverisja  juaj, z. Meta?

Sikur e lamë të merreshim vetëm me reformën në drejtësi.

Dolëm këtu, sepse  mendova që  kishit ardhur me idenë që qeveria do të binte, por po shoh tani që paskeni ndërruar mendje nga dje në sot dhe  prandaj  po ju pyes.

Unë nuk kam ndërruar mendje dhe deklarova që duhet të gjejmë patjetër një zgjidhje dhe duhet ta votojmë në datën 21 për shumë arsye dhe  të gjithë janë dakord, por ka mosbesim. Që ta miratojmë me çdo kusht reformën, në rast se do të duhet,  unë jam gati  t’ia lë opozitës pozicionin e Kryetarit të Kuvendit, edhe postet politike të ministrave të LSI-së. Ndoshta edhe  PS-ja do të bënte të njëjtën gjë për hir të reformës, nëse reforma  është më e rëndësishme  se  çdo gjë tjetër dhe besoj se është e tillë, sepse ka të bëjë me 30 vjet dhe nuk ka të bëjë me  zgjedhjet e ardhshme dhe në këtë mënyrë të krijojmë një atmosferë mirëbesuese. Ju mund të pyesni pse qeveri ekspertësh për zgjedhjet. Sepse PD-ja ka disa  pretendime  për zgjedhjet e ardhshme, siç ishte edhe çështja e votimit elektronik, që në fakt zoti Basha donte ta vinte si kusht edhe në takimin e mëparshëm që ne patëm. Unë  i kërkova që mos ta përziente këtë çështje me  reformën në drejtësi dhe në këtë mënyrë, të jepeshin garanci që votat nuk do të cenoheshin.

1. Meta, nëse z. Basha do t’ju kërkojë për hir të reformës në drejtësi, që është e rëndësishme për 30 vjet, të bëhet një qeveri teknike dhe të shkojmë në zgjedhje të parakohshme, ju a do të ishit gati t’ia plotësonit këtë kërkesë?

Për hir të së vërtetës, z. Basha nuk e ka bërë këtë kërkesë. Kjo ka qenë ideja ime për t’i dhënë fund një situate absurde, ku askush nuk merrte përgjegjësi.

Nëse ju e kujtoni, z. Basha me këtë zgjidhje në përgjithësi dhe të gjithë donin të akuzonin njëri-tjetrin për fajtorë. Nëse Basha jua kërkon nesër në mëngjes, z. Meta, jeni i gatshëm të dilni nga qeveria, të rrëzoni këtë qeveri dhe të ngrini një qeveri teknike?

Atë që kam në dorë, unë e bëj që tani, t’i lë opozitës vendin tim si Kryetar i parlamentit, të gjithë ministrat që ka LSI –ja, të gjitha postet politike që ka LSI-ja t’i marrë opozita, përfshi edhe ministrin e Drejtësisë.

Opozita nuk pranon të hyjë në qeveri me Partinë Socialiste, në dijeninë time, por, nëse do të kërkohej një qeveri teknike dhe zgjedhje të parakohshme, jeni gati t’ia jepni?

Kjo është një çështje më e përgjithshme, por unë besoj se opozita kishte qëndrim tepër konstruktiv dhe i inkurajoj të vazhdojnë në këtë drejtim. Biseda e zotit Basha me z. Fleckenstein kishte qenë mjaft pozitive dhe shpresoj që kjo çështje të jetë një histori suksesi për të gjithë shqiptarët.

1. Basha ka deklaruar se nuk do të hyjë në zgjedhje me një qeveri politike të PS-së, por me një qeveri teknike. Nuk po ju them për zgjedhje të parakohshme, por në vitin 2017 do të jeni ju i gatshëm t’i plotësoni një qeveri teknike në zgjedhje opozitës?

Kjo është çështja më e parëndësishme për mua, në kuptimin jo të rëndësisë së zgjedhjeve dhe të mënyrës së qeverisë.

A do të jeni i gatshëm t’ia plotësoni këtë kërkesë opozitës?

Ju lutem, mund t’ju them se sot jam gati të bëj çdo sakrificë, si LSI, si Ilir Meta, që opozita të votojë dhe t’i rritet besimi për procesin ku kemi hyrë për reformën kushtetuese.

Për sa u takon zgjedhjeve të ardhshme, do të mbështes çdo kërkesë të drejtë të opozitës, përfshirë votimin elektronik, nëse është e mundur që të realizohet.

Nuk ka gjë që nuk realizohet po patët vullnet.

Varet edhe nga ana teknike, patjetër. Kemi kërkuar ekspertizën e ODHIR-it për komisionin parlamentar dhe bashkëpunimin me OSBE-në e kemi të shkëlqyer. Çdo gjë bëhet transparente.

Jua bëra edhe një herë pyetjen: zoti Meta, do të paraqisni një mocion mosbesimi për Kryeministrin Rama, për ta rrëzuar në parlament?

Nuk e kuptoj se kush i ushqen këto thashetheme.

Blendi Fevziu – LSI-ja. Të gjithë njerëzit e LSI-së, që vazhdimisht kontaktojnë me medien në këtë mënyrë.

Kush, për shembull?

Tani, për emrat… Pothuajse të gjithë.

Kush?

Pyetja është e drejtpërdrejtë: ka apo nuk ka një plan të tillë?

Nuk ekziston asnjë plan i tillë.

Po në qoftë se Kryeministri do të tentojë t’i nxjerrë jashtë ministrat e LSI-së nga maxhoranca dhe të marrë votat për t’i zëvendësuar ata?

Absolutisht, do t’i urojmë suksese! Mjafton të vazhdojë përpjekjet për konsensusin për reformën në drejtësi.

A ka dështuar lidhja juaj me Edi Ramën?

Unë nuk e kam këtë mendim, ajo vazhdon të jetë në provë.

Çdo të thotë “vazhdon të jetë në provë” pas 3 vjetësh, z. Meta?

Vazhdon të jetë në provë do të thotë se vazhdon të jetë në punë.

Është një aleancë mbi bazën e një programi, apo është një aleancë aferash, trafiqesh, përfitimesh të paligjshme dhe vjedhjesh?

Tani m’u duk sikur foli Doktori.

S’ka rëndësi, unë po ju bëj një pyetje. Z. Meta, cili është ky parim, cili është ky program që ju mban të bashkuar me z. Rama?

Unë mendoj se edhe reforma në drejtësi është mjaft e rëndësishme, pavarësisht se përpjekjet e mia kanë qenë dhe mbeten të vendosura për konsensus,  jo thjesht për 94 vota. Kjo është shumë e rëndësishme për kredibilitetin e reformës, për të ardhmen e vendit dhe për suksesin e këtij koalicioni, por mbi të gjitha është e rëndësishme për Shqipërinë.

Padyshim reforma administrative territoriale është një reformë tjetër e madhe dhe mjaft reforma të tjera, të cilat kanë dhënë impaktin e tyre pozitiv.

Jeni i kënaqur me mirëqeverisjen e vendit, z. Meta?

Aktualisht, nuk kam pasur kohë të mendoj për këtë çështje, sepse shqetësimi im kryesor është data 21 korrik dhe mundësisht të kemi 120 apo 130 vota.

A jeni i kënaqur ju, z. Meta, me koncesionet milionëshe që po jep kjo qeverisje me afat 10-vjeçar?

Nuk duhet të flas në përgjithësi…

A jeni i kënaqur ju, z. Meta, me përplasjen e ministrave me institucionet e tjera?

Jo, jam krejtësisht i pakënaqur për këtë gjë dhe krejtësisht i pakënaqur me çdo frymë konfliktuale që ekziston në përgjithësi në institucionet e shtetit, jo vetëm midis ministrave me institucionet, por edhe me institucione të tjera jashtë qeverisë. Unë mendoj se ne duhet të tregojmë një kulturë shtetformuese si klasë politike dhe në mënyrë të veçantë këtë duhet ta tregojmë ditën e enjte.

A do të kërkoni ju rikompozimin e qeverisë pas datës 21 korrik?

Nuk ekziston asnjë preokupim, apo prioritet imi në këtë drejtim. Ajo që kërkoj unë është çdo përpjekje për konsensus në datën 21 korrik.

Në datën 21 korrik është një gjë që duket se nga momenti në moment është duke kaluar, pra po gjendet një konsensus. Ju thoni që do ta votoni, zoti Rama thotë që do ta votojë, zoti Basha thotë që jemi afër konsensusit, nuk më duket ndonjë gjë, çështja  është si do të vazhdojë koalicioni juaj, jo raporti me opozitën? Ju pyeta: a do të vazhdojë normalisht?

Do të vazhdojë normalisht gjithçka.

Normalisht  nuk vazhdon, apo do të vazhdojë normalisht, që do të thotë, a jeni i kënaqur me këtë koalicion? A është kjo qeverisja që ju kishit menduar më 1 prill të vitit 2013, z. Meta?

Mendoj që koalicioni ka arritjet e tij, mendoj se në një vit  është shpenzuar më shumë se ç’duhet energji mediatike për reformën në drejtësi, në kuptimin e retorikës. Ka qenë një energji e panevojshme, mendoj unë, ndërkohë që mund të ishte harxhuar pak më shumë, pra fare pak për konsensusin dhe për një klimë më konstruktive dhe e them këtë, sepse edhe reforma në drejtësi do të ishte bërë me kohë, do të ishte miratuar në kohë, do të kishte filluar zbatimi tani, por njëkohësisht shumë energji që u harxhua në publik për reformën do të ishin investuar në fusha të tjera të programit ekonomik dhe social.

A do të kërkoni ju të jeni kandidat për President i ardhshëm i Shqipërisë me votat e kësaj maxhorance në mes të vitit 2017, z. Meta?

Dua t’ju sqaroj se do të jem  kandidat për kryetar i LSI-së, se kemi zgjedhjet tani.

Këtë po, por unë po ju pyes, në vitin 2107, në momentin kur ky parlament mund të tentojë të zgjedhë presidentin, a do të jeni ju kandidat, z. Meta? A është në ambiciet tuaja?

Nuk e besoj,  por mund t’ju them që në  çdo rast, në të ardhmen, nuk do të pranoja të isha President i Shqipërisë pa konsensus me opozitën.

Pra, do të tentoni të keni votat e të gjithëve, nëse do të donit të zgjidheshit president?

Po, por në të ardhmen, jo në vitin 2017. Tani do të jem kandidat për LSI-në prapë.

Ju keni qeverisur vendin në një koalicion me z. Berisha dhe aktualisht në koalicion me z. Rama. Po ju pyes personalisht dhe kjo është një pyetje  pak relaksuese, me cilin keni komunikuar më mirë?

Këtu nuk mund t’ju them ndonjë gjë të veçantë, por mund t’ju  them se unë kam pasur të njëjtën sjellje me të dy, edhe me z. Berisha edhe me z. Rama. Kam qenë korrekt me të dy.

Kush sillej më korrekt me ju?

Të paktën do të duhet të përfundojmë mandatin me z. Rama, që të jap një përgjigje të plotë, po në të dyja rastet LSI-ja ka qenë në një pozicion pak delikat, por ka qenë gjithmonë korrekte, bashkëpunuese, stabilizuese dhe përpjekja ime, në mënyrë të veçantë, ka qenë gjithmonë, edhe atëherë me z. Berisha, pavarësisht nga përplasjet e mëdha që mund të kishim me opozitën që drejtohej nga z. Rama, por edhe tani, për një sjellje sa më të qetë ndaj opozitës.

Cila do të jetë e ardhmja juaj në politikë? A do të mbani përgjegjësi ju për një dështim të qeverisjes, zoti Meta së bashku me z. Rama? A mbani përgjegjësi edhe ju për dështimet në qeverisje, apo kaloni në anën tjetër dhe ia ngarkoni partisë më të madhe?

Së pari, nuk ndodh kjo gjë, zakonisht ka ndodhur e kundërta, që fajin e ka LSI-ja. LSI-ja është forcë tepër e përgjegjshme, ndërsa për sa më takon mua, unë kam ardhur si opozitar në politikë nga lëvizja e dhjetorit.

Edhe në këtë qeverisje të parë?

Jo vetëm kaq, por edhe me Partinë Socialiste, në periudhën më të vështirë, ku të gjithë bëheshin me Partinë Demokratike, përfshirë ty dhe Ben Blushin, unë isha me rininë eurosocialiste, me Partinë Socialiste, por edhe më pas, në qoftë se nuk e keni harruar, kam qenë në qeveri me Nanon dhe jam ndarë me të për shkak të pikëpamjeve të tjera dhe sepse nuk kam pranuar arrogancën e drejtimit në atë kohë të Partisë Socialiste dhe të qeverisë, dhe për shkak të disa problemeve të tjera me integrimin europian.

Unë kam ardhur si opozitar dhe më pëlqen opozita dhe prandaj tani ndonjëherë më kritikojnë që kujdesem që opozita të mos ndjehet keq.

Nuk po ju vjen keq, z. Meta, që s’po ju vjen radha të bëni pak opozitë, se ngelët në pushtet?

Unë kam dalë vullnetar që përpara një viti për të kaluar në opozitë dhe ia kam thënë edhe z. Rama, që kam qenë i gatshëm në rast se ai do të bënte një koalicion me z. Basha.

Kjo ishte një paranojë juaja, apo kishte informacione konkrete në këtë drejtim?

Nuk është çështje informacionesh. Unë mendoj se sistemi politik në Shqipëri, aktualisht është i tillë, ku koalicioni është i pashmangshëm dhe në këtë mënyrë Lëvizja Socialiste për Integrim është një forcë politike gjithnjë e gatshme për të bërë edhe opozitën kryesore të vendit. Dhe do të ishte një opozitë model, ju siguroj!

1. Meta, në datën 21 korrik, pra tri ditë më pas, 72 orë më pas, votat e Lëvizjes Socialiste për Integrim do të jenë pro draftit të Reformës në Drejtësi që vjen nga znj. Nuland, apo jo?

Patjetër!

Në të gjitha versionet, edhe nëse opozita është dakord, edhe nëse opozita nuk është dakord?

LSI-ja është 100% me znj. Nuland dhe me z. Fleckenstein.

Pyetja e dytë: nuk do të ketë një rikompozim, rinegocim apo një, po e quaj, “rrëzim të qeverisë”? Pra, ju dhe zoti Rama jeni prapë në qeveri? E kemi keqkuptuar ne dje që ishit ndarë?

Po, ju keni keqkuptuar apelin që unë kam bërë domosdoshmërish për t’i dhënë një zgjidhje të qartë këtij problemi, në interes të realizimit dhe të mosdështimit patjetër të reformës në drejtësi dhe, për hir të këtij kompromisi, mund të bënim edhe këtë gjë tjetër.

Pra, ju po qetësoni Partinë Socialiste, që të mos dalë të mbledhë vota lart e poshtë për të garantuar 71 votat, përfshirë edhe disa nga votat e LSI-së, që po tentonte t’i mbante…?

Nuk e di, domethënë, kjo është një çështje tjetër dhe nuk dua të merrem me…

Por besoj që keni informacion për këtë, z. Meta.

Nuk kam pasur kohë të merrem me informacione të tjera, përveç përpjekjeve për të gjetur konsensus.

Po sot përse i kërkuat dhe i takuat ministrat e Lëvizjes Socialiste për Integrim? Kishte ndonjë lidhje me deklaratën e djeshme, apo ishte një takim rutinë?

Jo, jo, nuk kam takuar. Kryesisht kam qenë me z. Manjani, që po më sqaronte disa çështje konkrete të reformës.

Jeni i kënaqur nga puna e ministrave të LSI-së në qeverisjen e vendit?

Mendoj se përpiqen me përgjegjshmëri maksimale, por gjithmonë ka vend për përmirësime.

Në gjykimin tuaj, megjithëse është ende herët, në zgjedhjet e vitit 2017 LSI-ja do të dalë në koalicion me një nga dy partitë kryesore, apo i ka ardhur dita t’i masë forcat edhe e vetme?

Tani, LSI-ja i ka matur e vetme me kohë, por nuk është ky problemi. Çështja kryesore e LSI-së është që në datën 21 përpjekja e saj kryesore për miratimin me konsensus të reformës të realizohet me sukses, sepse kjo është shumë e rëndësishme për stabilitetin e vendit dhe për integrimin europian të vendit, sepse në fund fare quhet Lëvizja Socialiste për Integrim.

A është e vërtetë se ju keni krijuar një lloj aleance edhe me z. Kokëdhima dhe me persona të tjerë të larguar të Partisë Socialiste? Sot shtypi ka lajmëruar se e keni vizituar edhe në shtëpinë e tij për 1 orë dhe ka informacione të tjera që raportet e tij me Kryeministrin Rama, megjithëse dikur kanë qenë  miqësore, janë shumë të ftohta për momentin.

Raportet e mia me z. Kokëdhima janë raporte formale. Ai gjithmonë ka qenë një partizan i vjetër i bashkimit të së majtës dhe i koalicioneve PS-LSI. Kohët e fundit ka pasur disa shqetësime dhe disa desinformacione sikur unë kisha punuar që ai të humbte mandatin në  Gjykatë Kushtetuese. Ndoshta kjo është edhe arsyeja që jemi takuar pak më shpesh, dhe është shumë i qartë që unë nuk ndërhyj në vendimet e gjykatave.

Që nuk keni ndërhyrë në rastin e z. Kokëdhima.

Në asnjë rast.

Atëherë, i ka ndërhyrë Rama?

Jo, jo nuk paragjykoj asnjë gjë, por kjo ishte një nga shkaqet pse jemi takuar kohët fundit pak më shpesh.

A është qeverisja që kemi ne sot ajo që ju keni menduar në vitin 2013, kur u bashkuat me PS-në?

Po të ishte më pak arrogante, mendoj se do të kishte qenë më e suksesshme dhe, po të ishte edhe më pak konfliktuale, do të kishte qenë edhe më e  suksesshme.

Nëse ky koalicion do të vazhdojë me këtë lloj qeverisjeje, ka shanse që t’i fitojë zgjedhjet  e ardhshme?

Këtu nuk bëhet fjala për të fituar zgjedhjet e ardhshme, këtu bëhet fjala për të fituar të ardhmen e vendit për 30 vjetët që vijnë dhe kjo kërkon konsensus ditën e enjte.