Ja sherri Rama-Blushi sot në grupin parlamentar.Tashmë janë armiq

Mësohet se çka ndodhur realisht me Ramës dhe Blushit në mbledhjen e grupit Parlamentar të PS-së. Fillimisht ka folur Gramoz Ruçi i cili tha se ka një kërkesë për të shqyrtuar ngjarjen e Elbasanit po që është më mirë ta shtyjmë se ajo i takon partisë të këtij Qarku. Menjëherë më pas e ka marrë fjalën deputetja Arta Dade që ka bërë një kërkesë për shqyrtimin e kësaj ngjarjeje. “Kjo ne socialistëve nuk na ka ndodhur veçse në kohën e Berishës. Si mundet që ne te kemi mbërritur në pikën për ta sulmuar një kolegun tonë deri edhe fizikisht. Po ju Anastas (Angjeli) dhe Musa (Ulqini) si socialistë të vjetër si nuk ndërhytë në këtë ngjarje” i ka bërë thirrje ajo. Pas kësaj e ka marrë fjalën Ben Blushi duke thënë se atij nuk mund t’ia heqin të drejtën për të rrëfyer atë që ka ndodhur. “Nuk është burrërri që të mos më japësh fjalën” i ka thënë ai Ruçit.

Por kur deputeti i Elbasanit është ngritur për të rrëfyer atë që kish ndodhur fundjavën e kaluar në këtë qytet, ai ka akuzuar Edi Ramën si nxitës të dhunës. “Njerezit atje nuk kanë faj, fyerjet ndaj meje janë frymëzuar që këtu” ka thënë Blushi.  Dhe kur ky i fundit ka lëshuar shprehjen se “kjo parti mbron kriminelët dhe sulmon ata që kërkojnë votime”, Rama  ka përplasur në mënyrë demostrative një gotë uji në dysheme dhe më pas ka filluar të bërtasë në drejtim të Ben Blushit: “Shpifës, ti je shpifës!”. Një burim brenda grupit tregon se Rama vazhdoi t’i ulërasë deputetit të tij: “Ku i ke emrat, trego emrat e kriminelëve, u bënë dy vjet që shpif! “. Ngritja e toneve mes të dyve ka zgjatur më shumë se 20 minuta pa ndërprerje. Ndërkohë që Rama ulëriste edhe Ben Blushi vazhdonte me të njëjtin ton duke thënë: “Kriminelët në këtë parti i solle ti dhe do të duhet kohë që ta shlyejmë këtë damkë”. Debati është mbyllur kur Rama ka përsëritur etiketimin “Shpifës”,ndërsa Blushi i është përgjigjur: “Ti nuk ke burrëri as deri tek taka e këpucës”.

“Ata shkëmbyen edhe mjaft sharje e ofendime të rënda në mes të deputetëve që qëndronin të heshtur, por shumë prej tyre humbën mes ulërimave dhe gjendjes së nderë”, tregon një deputet i PS-së i cili ishte dhe në Elbasan.

Pas kësaj nuk ka më asnjë shpresë për paqtim mes tyre, ndonëse dikur ishin shumë miq. Ben Blushi dhe Edi Rama janë armiq mes tyre dhe nuk dihet se deri ku do të shkojë armiqësia e tyre, pavarësisht se nga shtabi i Blushit thonë se në Kongres Blushi do të nxjerr emra, fakte, dokumenta dhe foto për disa gjëra, të cilat nuk t’i përdorin para kongresit.

Të merkurën pritet edhe një përballje e parafundit mes tyre në mbledhjen e Asamblesë Kombëtare të PS-së. Por Ben Blushi këto fakte nuk do t’i përdorë në Asamble, por vetëm në Kongres.