Kërcënimi ndaj Bashës, Meta thërret në takim kreun e SHISH

Presidenti Ilir Meta ka thirrur në një takim kreun e SHISH, Helidon Bendo në lidhje me informacionet për kërcënimin e kreut të PD, Lulzim Basha. Në takim nga ana e Presidentit është thirrur dhe Komandanti i Gardës së Republikës, Gramos Sako, i cili ka përgjegjësi për ruajtjen e personaliteteve dhe drejtuesve të institucioneve shtetërore.

Takimi vjen pas një komunikimi që Ministri i Brendshëm, Sandër Lleshaj ka bërë me një prej bodigardëve të kreut të PD, Lulzim Basha. Në komunikimin e zhvilluar mes ministrit dhe rojës së Lulzim Bashës, i është thënë nga ana e titullarit të këtij institucioni se kreu i opozitës është i kërcënuar.

Ky komunikim aspak ligjor dhe institucional është denoncuar sot nga Partia Demokratike.

Lidhur me këtë komunikim, PD akuzoi sot ministrin e Brendshëm, Sandër Lleshaj për shantazh për qëllime politike. Në shkresën drejtuar ministrit të Brendshëm e që mban firmën e sekretarit të përgjithshëm të PD, Gazmend Bardhi, demokratët i referohen një takimit të ministrit Lleshaj me një prej punonjësve të gardës së Republikës, truprojë e Lulzim Bashës, mbi rrezikun që i kanoset sipas ministrisë së brendshme kreut të opozitës.

Në letër Gazment Bardhi shkruan se z.Lleshaj ka shkelur cdo procedurë dhe cdo mënyrë institucionale të trajtimit të kësaj çështjeje.