PS, shkrimtari kundër piktorit !

Me 19 mars në kongresin e PS-së po shkohet me dy kandidatura për postin e kryetarit të selisë rozë. I pari dihej që ishte Edi Rama; piktor, kryetar i PS-së dhe kryeministër. Ndërsa nga dje Ben Blushi foli hapur tek “Top Channel” se do të paraqesë një platformë për kongresin, gjithnjë nëse do të ketë zgjedhje, pasi akoma dyshon se Rama kërkon të mos bëjë zgjedhje për kryetarin e PS-së me argumentin se “ kryetari që fiton zgjedhjet elektorale nuk ka përse votohet në parti”. Pra mund të rrijë kryetar 8 vjet, 12 vjet… pa u votuar nëse votohet nga populli. Në fakt ky është rast i pa ndodhur në Europë. Ky ndryshim statuti në parti duket se do të synohet të bëhet që në fillim të punimeve të kongresit të PS-së, duke eliminuar konkurimin në sallën me delegatët socialistë. Në të vertetë nëse ndodh kështu, pra pa asnjë konkurim emrash, atëhere kot që mblidhet kongresi. Por duket se presioni i bazës socialiste dhe pakënaqësia e tyre pasi nuk po gjejnë punë, nuk po rregullojnë mirëqënien siç iu premtua, do të sjellë reagimin e tyre që të ketë debate në kongres si dhe të shprehin vullnetin e tyre me votë të fshehtë në kongres për numrin një të partisë.

Nëse Rama pranon konkurimin atëhere do të ketë një supërkongres, pasi Ben Blushi po përgatitet seriozisht me një platformë se si të jenë socialistët në pushtet e jo “rilindja”, se si të përmirësojnë koalicionin qeverisës, etj.

Me pak fjalë do të kemi shkrimtarin Blushi përballë piktorit Rama! Duel brilant! 

TCH: A do të garoni për postin e kryetarit të partisë, përballë Edi Ramës?

Ben Blushi: Nuk është kjo çështja. Çështja është nëse ka, apo jo, zgjedhje. Duhet të pyesni Edi Ramën dhe duhet ta japë këtë përgjigje besoj. Pse i pengon zgjedhjet për kryetarin e partisë? Kjo është dilema e madhe e këtij Kongresi. Pra, a do të ketë, apo jo, zgjedhje për kryetarin e partisë? Sigurisht që duhet të ketë, sepse mandat 7-vjeçar nuk ka kryetar partie që të ketë. Është e pamundur, e padrejtë, e papërligjur, jashtë çdo tradite tonën dhe europiane, që një kryetar partie të ketë një mandat të përhershëm. Nëse shkohet për këtë në Kongres, unë nuk mund ta pranoj. Në ditën që do të ketë zgjedhje, do të them nëse do të kandidoj apo jo.

TCH: Nëse do të ketë garë, ju jeni i gatshëm për të kandiduar?

Ben Blushi: Besoj se ka arsye, që të ketë më shumë se një kandidat në këtë Kongres. Jo vetëm për t’i dhënë kuptim garës, por sepse Partia Socialiste ka nevojë për një platformë alternative, sesi të qeveriset më mirë; çfarë qëndrimi duhet të mbajë partia; koalicioni që ka, apo që duhet të ndërtojë, si dhe shumë çështje të tjera që janë në diskutim, të cilave Partia Socialiste pa kolegjialitet nuk po u jep përgjigjet e duhura.

TCH: A do të jeni ju njëri prej atyre në garë?

Ben Blushi: Ditën që do të ketë zgjedhje, do ta them me patjetër. Duhet të vendosim që të kemi zgjedhje njëherë. S’mund të ketë parti pa zgjedhje. Ditën që do të ketë zgjedhje, do të vendos se çfarë do të bëj. Por, pse nuk e pyesni Edi Ramën se, përse i pengon zgjedhjet në parti? Kush është arsyeja që i pengon?

TCH: Ka disa aludime, që po përgatiteni për ngritjen e një partie të re. Sa e vërtetë është kjo?

Ben Blushi: Unë jam në një parti, jam pjesë e një partie politike që nga viti ’97, shpresoj që ajo të bëhet më e mirë dhe po përpiqem që ajo të përmirësohet, sepse besoj që ka mundësi të përmirësohet. Kam një pyetje për të gjithë: A mund të ketë një vend demokratik, nëse partitë e veta nuk janë demokratike? A mund të jetë Anglia, për shembull, apo vendet e Europës në përgjithësi, vende demokratike, nëse partitë e tyre nuk bëjnë zgjedhje, janë monokratike, nuk përfaqësohen të gjithë ata që mendojnë ndryshe, nuk ka zgjedhje, s’ka kolegjialitet? Imagjinoni për shembull në Britaninë e Madhe, sikur laburistët të mos kishin zgjedhje dhe t’i jepnin kryetarit mandat të përhershëm? Kjo është ajo fatkeqësi, që po ndodh sot në Shqipëri. Prandaj të gjithë problemet që kemi sot, kriminalizimin, financimet e dyshimta, mungesën e kolegjialitetit, vendime jashtë statutit e që bien ndesh me programin… Sidomos në rastin tonë kjo po theksohet, nuk po qeveriset si një parti e majtë. Këto pra, gjithmonë e më shumë bëhen prè apo vendime të një njeriu. Unë jam kundër kësaj praktike dhe po shkojmë në Kongres për ta refuzuar këtë vullnet.

TCH: A do të keni një platformë tuajën në Kongres?

Ben Blushi: Sigurisht që po. Është e sigurtë që do të kem, ose do të mbështes një platformë.