Monika Kryemadhi: Rama dhe Lu po kërcënojnë njeri-tjetrin

Monika Kryemadhi ka komentuar sot qëndrimet e kryeministrit Edi Rama ndaj SHBA dhe deklaratat e ambasadorit amerikan, Donald Lu. Në një intervistë dhënë për emisionin “Java” në RTSH, Kryemadhi tha se kryeministri dhe diplomati i SHBA-ve janë duke kërcënuar njeri-tjetrin.

“Shikoni se çfarë po ndodh, doli dje Donald Lu dhe i tha Ramës ju pres deri në pranverë për arrestimin e peshqve, del Edi Rama në mbrëmje dhe thotë Ambasadori nuk më kërkoi të votoja pro rezolutës në OKB. Pra këto kërcënojnë në distancë njëri-tjetrin”, tha Kryemadhi.

Kryemadhi tha se reforma në drejtësi ka hyrë në një krizë institucionale për shkak të arrogancës së mazhorancës dhe Edi Ramës.

Referuar protestës së 27 janarit, Kryetarja e LSI-së u shpreh se policia tentoi të përhapte panik, në mënyrë që mos kishte masivitet pjesëmarrjeje në këtë tubim.

“Ambasadorët përfaqësojnë vendin e tyre, por varet çfarë profesionesh kanë. Sot përshembull na rezulton se PD kishte të drejtë që nuk votoi 7 ligjet në kuadër të Reformës në Drejtësi, Ylli Manjani na thonte që ligjet s’duhen votuar, por Ilir Meta na tha në atë kohë, duhen votuar se na i kërkon BE”, tha Kryemadhi në studion e TVSH-së.

 Lidhur me arrestimin e Dashamir Xhikës, Kryemadhi tha se ai është një arrestim politik. “Xhika është arrestuar nga një prokurore me një dosje që e mban prej 3 vitesh dhe unë nuk e kuptoj sepse e ka mbajtur kaq kohë këtë dosje. Por ajo mund të them është që një prokuror e mban një dosje kaq kohë ka vetëm një qëllim: ose për shantazh ose për përfitime”, tha Kryemadhi.