Kryeministri Rama flet për përmbytjet: Ndryshimet klimatike dhe mbetjet plastike, sfidat tona të përbashkëta

Kryeministri Edi Rama ka hapur vitin e ri të punës me një takim me drejtuesit e vendorë, ku u fokusua te objektivat e vitit 2026, përgatitjet për sezonin turistik dhe problematikat mjedisore. Gjatë fjalës së tij, Rama vuri theksin te ndryshimet klimatike, duke marrë shkas nga përmbytjet dhe moti i paqëndrueshëm i ditëve të para të janarit.

“Meqë është takimi i parë i vitit, ju uroj një vit sa më të mbarë familjarisht, profesionalisht dhe politikisht. Sot jemi këtu në vijim të takimeve të organizuara për të çelur vitin duke diskutuar për sfidat dhe patjetër për të vënë bashkë disa piketa të rrugës dhe për të përcaktuar çështjet kryesore me të cilat duhet të merremi bashkarisht sepse për çështjet që kanë të bëjnë me administrimin e vogël në këto bashki, ato ju i dini vetë.

Dua ta nis me faktin që viti nisi me një situatë të vështirë atmosferike që preku një pjesë jo të vogël të komuniteteve dhe që na përballi me sfidën e emergjencës në kushtet që emergjencat po bëhen sistematike e po marrin një profil tjetër si rezultat i ndryshimeve klimatike. Kemi më shumë thatësirë e zjarre e më shumë befasira në aspektin e atmosferës ku krijohen vorbulla si ajo e ditëve të para të vitit që sipas ekspertëve janë vorbulla që janë ngërçe në qarkullimin e flukseve të ajrit.
Situata u ndërlikua nga papërgjegjshmëria rrëqethëse e dikujt prej nesh që e trajtojnë ambientin si landfill dhe hedhin shishe e qese plastike”, tha ai.