Kush ia vodhi votat? Mjeku Ilir Alimehmeti tregon abuzimet, flet edhe për Tabakun

Kandidati i PD-së në listën e hapur për Tiranën, mjeku Ilir Alimehmeti i cili mori një mbështetje të madhe, por që nuk mundi të marrë mandatin, thotë se procesi i numërimit në zgjedhjet e 11 majit pati parregullsi të mëdha. Kjo sipas tij bazohet edhe në faktin që KAS vendosi rinumërimin e votave.

Ilir Alimehmeti theksoi se ”Numërimi kishte dy procese; i pari ishte numri i mandateve që shihej me kujdes nga subjekti politik se edhe interesi publik është më i madh. Dhe momenti i dytë ishin kandidatët e listës së hapur që hynin në lojë në një moment të dytë. Ne kemi patur vëzhguesit tanë. Dhe nga këta njerëz ne kemi indicie të parregullsive të mëdha.

Unë rrugën time e kam institucionale dhe i jam drejtuar KQZ-së me një sërë vërejtjesh e provash, të cilët ato kanë gjykuar që të mos i shohin po të rrëzojnë kërkesën me një artificë ligjore, dhe nuk kanë folur asgjë për provat në vetvete. Por fakti që u rikthyen dhe kërkojnë rinumërimin do të thotë që është mbështetje e plotë nga ana e PD për këtë gjë. As ne nuk do të kishim ankesa, po të mos kishte parregullsi. Janë shumë më të qartë njerëzit se institucionet”,-tha në ”A2cnn”.

Po ashtu Alimehmeti u përgjigj edhe për raportet me Jorida Tabakun, duke qenë se ishin në garë me njëri-tjetrin në listën e hapur të Tiranës. Për këtë ai fajëson sistemin që synon garën e brendshme dhe jo atë me kundërshtarin.

”Nuk ka asnjë luftë mes meje dhe zonjës Tabaku. Unë jam kundër termit luftarak. Është garë mes njerëzish. Gara është për kundërshtarin politik, ky sistem politik duhet hedhur në kosh. Është prodhuar që t’i kthejmë sytë jo mes kundërshtarëve, por brenda shtëpisë sonë dhe brenda shtëpisë së saj, pra PS. Kjo nuk duhet të ndodhë se nuk është e mirë për njerëzit”- nënvizoi mjeku i njohur.