Reagon Basha: Largimi i Shkullakut dhe Lelës, ditë e zezë për mediat

Për kreun e opozitës, Lulzim Basha, dita e djeshme ishte një ditë e zezë për median, lirinë dhe demokracinë.

Përmes një deklarate të shpërndarë për mediat nga zyra e shtypit e PD-së, Basha thekson se largimi i dy drejtuesve, Armand Shkullaku nga ABC news dhe Alfred Lela nga gazeta MAPO, është një lajm i keq për vendin, është një hap më shumë drejt zaptimit të medias nga një regjim i korruptuar e kriminal.

Në foto: Armand Shkullaku

Në foto: Alfred Lela

“Dje ishte një ditë e zezë për median, lirinë dhe demokracinë”

Largimi i dy drejtuesve, Armand Shkullaku nga ABC news dhe Alfred Lela nga gazeta MAPO, është një lajm i keq për vendin, është një hap më shume drejt zaptimit të medias nga një regjim i korruptuar e kriminal.
Armand Shullaku dhe Alfred Lela nuk kanë nevojë për vlerësimin tim, sepse ata i kanë vlerësuar dhe respektuar qindra mijëra shqiptarë në shumë vite kontribut publik. Ata nuk kanë nevojë as për mbrojtjen time, sepse puna, talenti dhe aftësia e tyre janë mbrojtje ndaj çdo lloj regjimi.
Por largimi i tyre, vetëm për t’i vënë këto media në shërbim të plotë ndaj qeverisë është lajm i keq për të gjithë.
Është lajm i keq sepse kur politika, interesat e biznesit dhe media bëhen bashkë, ditë të vështira vijnë për një vend dhe popull. Kjo ditë ka ardhur për Shqipërinë.
Ata janë bërë bashkë për të ruajtur pushtetin dhe paranë. E keqja është bërë bashkë, kundër qytetarëve.
Tani është koha që qytetarët të bëhen bashkë kundër tyre. Ne nuk do t’ia dorëzojmë vendin sunduesve që pas fasadave dhe mashtrimeve mediatike po vjedhin dhe po vrasin një vend dhe një popull”,– deklaron Basha.