“Më rrahën se shava Ramën”. Policia: Vetëm e këshilluam, nuk është dhunuar

Tre ditë më parë, një qytetar nga qyteti i Korçës pretendon se u dhunua nga policia dhe garda. Niko Ndini, 53-vjeç, thotë se policia e ka rrahur pas deklaratave fyese drejtuar kryeministrit Rama.

Policia e Shtetit ka reaguar sot lidhur me deklaratat e 53-vjeçarit. Zëdhënësi i Policisë së Shtetit, Genti Mullai sqaron ngjarjen, duke u shprehur se ndaj 53-vjeçarit Niko Ndini nuk është ushtruar dhunë, por është këshilluar.

“Nisur nga disa shkrime te publikuara në portalet online, ku pretendohet se një qytetar në qytetin e Korçës, është dhunuar e goditur në automjetin e Policisë nga Shefi i Seksionit të Rendit, në Komisariatin e Policisë Korçë, Mariglen Jaçellari, ju informojmë se:

Më datë 24.12.2016, rreth orës 13:20, gjatë vizitës që Kryeministri ka kryer pranë “Muzeut Kombëtar të Artit Mesjetar” në qytetin e Korçës, një qytetar konkretisht shtetasi Niko Ndini nga ana tjetër e rrugës, (në trotuar) filloi të bërtasë e të përdorë fjalë fyese në drejtim të Kryeministrit, duke u bërë shqetësim për pjesëmarrësit e tjerë. Në këtë moment, drejt qytetarit janë afruar shërbimet e Policisë dhe shoqëruesit e Kryeministrit të cilët e kanë këshilluar qytetarin, që të mos vijonte me këtë sjellje e të mos bërtiste.

Theksojmë se ky shtetas nuk është dhunuar nga asnjë punonjës Policie dhe as nuk është shoqëruar në ambientet e Komisariatit të Policisë Korçë”, thekson zëdhënësi i Policisë për Balkanëeb.

Niko Ndini thotë se teksa ka parë kryeministrin Rama që po shkonte drejt Muzeut të Artit Mesjetar, i është afruar dhe ka hedhur parulla kundër qeverisjes së tij, duke shprehur mbështetje për Ben Blushin. Por pas kësaj, ai thotë se e kanë futur forcërisht në një mjet policie, dhe e kanë dhunuar.

Ndini akuzon shefin e Rendit të Komisariatit të Korçës, Mariglen Jacellari, se e ka dhunuar dhe goditur pa asnjë shkak të ligjshëm. Këto akuza ai i ka përsëritur edhe me zë e figurë, në një video që kreu i LIBRA-s Ben Blushi ka publikuar në rrjetin social “Facebook”.

http://www.kohajone.com/2016/12/26/blushi-niko-dinko-deshmon-si-e-rrahu-edi-rama/