Meta, Rama, Basha dhe Berisha sipas “sondazheve” të blera kryeministrore

Edi Rama njihet se ka një aftësi kamuflazhi dhe intrige në prapaskena politike, sa jo vetëm palosi Lulzim Bashën si një “sardele” duke e rrotulluar siç deshi vjet në maj, por fut në kurthin e ditës edhe ish-kryeministrin Berisha. Me presidentin Meta, për momentin, rri në distancë, herë duke e lëmuar, dhe disa herë duke i ngrënë “copa mishi” nga ish-partia e tij.

Edi Rama mori zgjedhjet, në mënyrat që tashmë dihen. Ka plot 74 deputetë puro rilindas-socialistë, mban edhe 4 vota “çamesh” e “socialdemokrat”; mori prokururorinë si institucion i pavarur, po gllabëron gjykatat me “komisione vettingu”, mediat i miklon me leje ndërtimi e pazare lekësh dhe i censuron me autocensurë, biznesmenët i shkojnë vetë pas dere. Edhe kur nuk don, ata vetë si biznesmenë të “qerasin”.

Ekonomia është copë-copë, taksat në rritje për ata që paguajnë. Mirëqënia në rënie, papunësia rritet në mënyrë gjeometrike, pensionet shtohen me një kafe në vit (!), dhe çuditërisht sondazhet e nxjerrin si njeriun më pozitiv!

Sa lekë paska qeveria, aqsa edhe sondazhet e “pavarura” me “albania” në fund e nxjerrin kryeministrin si personi më pozitiv në Shqipëri. Një kompani sondazhesh me financime qeveritare e nxjerr sot online si njeriun pa asnjë negativitet, aqsa mund të jetë një kandidat për çmimin “Nobel” për popullaritet në një vend me papunësi me tepër se gjysma e popullsisë.

Edi Rama e meriton “sondazhin” vetëm nëse në qershor Shqipëria merr statusin e kandidatit për në BE.