Miku i Edi Ramës, ish-kryeministri britanik Blair, po negocion me Vuçiç
Disa herë ishte folur se pas dyshes Vuçiç-Thaçi fshihet dora e kryeministrit Rama. Dhe përditë po del në dritë të diellit se Edi Rama është në lojë, ndonëse nxjerr ministrin e jashtëm Bushati që ta kritikojë versionin mes presidentit serb dhe presidentit kosovar. Dihet tashmë se ish-kryeministri britanik Toni Blair është mik i ngushtë i Edi Ramës, bile qeveria shqiptare ka paguar atë në shuma të majme si këshilltar special.
Por express i Kosovës shkruan se presidenti i Partisë Popullore në Serbi, Vuk Jeremiq, thotë se ish-kryeministri britanik, Tony Blair, në emër të presidentit serb, Aleksandar Vuçiq, po negocion për “ndarjen e kufirit” me Kosovën.
Vajtje ardhjet e ish-kryeministrit britanik Londër-Tiranë-Beograd-Tiranë-Londër tregojnë se ai po luan një rol. Natyrisht ai tashmë ka zyrë private këshillimore dhe paguhet.
Në një njoftim për media të partisë së Vuk Jeremiq, thuhet se javën e kaluar, Blair për këtë temë ka biseduar me kancelaren gjermane, Angela Merkel dhe me zyrtarë francezë, ndërsa javën e ardhshme do të ketë një takim edhe me përfaqësues të Këshillit për Siguri Kombëtare të SHBA-së.
“Gjatë sesionit të Asamblesë së Përgjithshme të OKB-së, nga zyrtarë shumë seriozë e të lartë, kam marrë vesh se Tony Blair për këtë shërbim merr para nga Lindja e Afërt. Përmendet edhe shuma prej 150.000 dollarësh në muaj, plus kompensime për punën e kryer, nëse Blair zbaton idenë e Vuçiqit për ‘demarkacion’ dhe Prishtina bëhet anëtare e OKB-së”, ka thënë Jeremiq në televizionin serb N1.
Jeremiqi ka shtuar se për takimet e Blair me Angela Merkelin dhe me zyrtarë amerikanë ka mësuar nga disa burime shumë të informuara, në mesin e të cilëve janë edhe ata nga Evropa.
“I bëj ftesë Vuçiqit që të më hedh poshtë nëse nuk është e vërtetë kjo që po e them. Tani po zhvillohet manovra më e rrezikshme taktike e Vuçiqit në lidhje me Kosovën që kur ka ardhur në pushtet. Kush e ka paguar Blair dhe çka ka përfituar Serbia nga dhënia e parave ish-kryeministrit britanik”,- ka pyetur Jeremiqi.
Ish-ministri i Jashtëm serb, Jeremiq, thotë se Vuçiqi “përmes lotëve të krokodilit ka deklaruar humbjen e politikës për Kosovën” në mënyrë që zgjidhja e problemit të Kosovës të largohet nga sytë e publikut dhe pastaj, kur përfundimisht të arrihet marrëveshja, të bëjë një “politikë blickrig” që zgjidhja të jetë e pranueshme në Serbi.
Pra Blair me lejen e Ramës, Vuçiç dhe Thaçit po luan fijet për të firmosur ndryshimin e kufirit mes Kosovës dhe Serbisë. Nga ky plan Kosova humb veriun e Mitrovicës, Trepçën dhe liqenin e Ujmanit.
Nëse në vitin 1999 Toni Blair si kryeministër i Britanisë, bashkë me Presidentin Bill Clinton e çliruan Kosovën nga pushtimi serb, ndërsa sot ai po bën tratativa për ndryshim kufiri, ku siç duket fiton Serbia.
Ish-kryeministri britanik njëherë e çliroi, kurse tani po e ndan!
