Ministri Ditmir Bushati: Kryeministri e ka vendosur se do ndryshim politik të ministrisë së Jashtme

Ministri në detyrë për Europën dhe Punët e Jashtme, Ditmir Bushati, në konferencën e dhënë për mediat me homologun italian, u shpreh se vendimmarrja për postin e tij ishte politike nga ana e kreut të qeverisë.

“Sa i përket dimensionit politik. Kryeministri e ka marrë vendimin e tij dhe ia ka bërë të ditur opinionit publik për të ndryshuar drejtimin politik të MEPJ. Është e drejtë dhe përgjegjësi ekskluzive e Kryeministrit për të përzgjedhur ekipin e tij politik me të cilin ai do të përmbushë objektivat e programit në këtë fushë”, tha Bushati pas takimit me ministrin e Jashtëm italian.

Duke thënë se këto “janë edhe orët e mija të fundit në krye të ministrisë”, Bushati falënderoi stafin, Kryeministrin Rama dhe Partinë Socialiste që i dhanë mundësinë për të përfaqësuar vendin.

Deklarata e plotë e Ministrit Ditmir Bushati:

“Në lidhje me pyetjen që mu bë ndoshta sot është dita e duhur për mua që dhe unë të shpreh opinionin tim duke qenë se shumë është folur dhe ka mbuluar të gjithë këtë periudhë. Mund ët them që e kam konsideruar që ditën e parë punën time në këtë institucion nder dhe privilegj që më është dhënë për të përfaqësuar vendin tim në arenën ndërkombëtar dhe për këtë unë dhe sot dua të falënderoj kryeministrin Rama dhe forcën politike të cilën përfaqësoj, për besimin që më kanë dhënë. Në të njëjtën kohë natyrisht dua të falënderoj të gjithë ekipin e shërbimit të jashtëm, qoftë stafin diplomatik dhe teknik, që nga mesi i shtatorit e deri këto orë të fundit të miat në MEPj që më kanë shoqëruar e mbështetur për të arritur disa objektiva të rëndësishme në funksion të jetësimit të prioriteteve të politikës së jashtme të Shqipërisë.
Besoj se është e qartë për këdo që pozicioni i ministrit ka dy dimensione: ka dimensionin kushtetues dhe dimensionin politik. Përsa i përket dimensionit politik, kryeministri e ka marrë tashmë vendimin e tij, ia ka bërë të ditur opinionit publik për të ndryshuar drejtimin politik të MEPJ. Është e drejtë dhe përgjegjësi ekskluzive e kryeministrit për të përzgjedhur ekipin e tij politik me të cilin ai do të përmbushë objektivat e programit edhe në këtë fushë.
Thënë kjo, në kuptimin kushtetues, apeli im sot është shumë i thjeshtë: për të ezauruar një orë e më parë procedurën kushtetuese që jetëson jo vetëm ndryshimin e lidershipit politik në MEPJ, por që do t’i krijonte njëkohësisht mundësi vendit për tu përfaqësuar në mënyrën të denjë dhe efeciente në arenën ndërkombëtare, aq më tepër ku siç e patë dhe gjatë konferencës së shtypit me kolegun tim italian vendi është përballë sfidave të cilat nuk i ka njohur të paktën më parë.
Dua në të njëjtën kohë meqenëse mu dha kjo mundësi tu falënderoj të gjithëve ju, kolegëve të medias, të cilët keni ndjekur shumë konferenca shtypi, çaste të lumtura dhe kritike për Shqipërinë, për këtë institucion. Një pjesë prej jush kemi shkëmbyer dhe replika mbase dhe pakënaqësi për mënyrën se si mund të jenë analizuar lajmet që kanë pasur lidhje me këtë institucion po realisht dua tu falënderoj nga zemra të gjithëve për mundësinë që na keni dhënë për të çuar në shtëpitë e çdo shqiptari dhe që keni kontribuar jo pak do të thoja, për një kuptueshmëri më të madhe të të gjitha aksioneve dhe lëvizjeve tona në politikën e jashtme. Ju falënderoj të gjithëve”.