Ministri Manjani: Gjyqtarë, prokurorë! Nuk do ta keni aspak lehtë Vettingun

Ministri karizmatik i kabinetit Rama, Ylli Manjani sot në një takim me shoqatën e avokatëve penalistë tha ndër të tjera se “Gjyqtarët dhe prokurorët nuk do ta kenë të lehtë kalimin e Vetting-ut”. Ministri i Drejtësisë Manjani ka urdhëruar, krahas ILDKP, edhe një hetim nga zyrat e Ipotekave të Shqipërisë kalimin në sitë të pronave e pasurive të gjyqtarëve e prokurorëve, e jo vetëm të tyre. Edhe familjarët e tyre dhe çdo lidhje që e kap ligji për hetim të rrethit familjar të tyre.

Burime të mirëbesuara tregojnë se nga zyrat e ipotekave janë dërguar në zyrën e ministrit të drejtësisë pasuritë e çdo gjyqtari e prokurori si dhe rrethi familjar në prona e pasuri. Po këto burime tregojnë, por që nuk donin të identifikoheshin për median, se nga këto të dhëna nuk besohet ta kalojnë Vetting-un 4 gjyqtarë të Gjykatës së Lartë, sepse ka dyshime të mëdha në fitimin e pasurisë dhe pronësisë së tyre; 2 janë Gjykatën Kushtetuese, 9 gjyqtarë në gjykatat e Apelit Administrativ në vend, 5 kryetarë gjykatash të shkallës së parë, 3 kryetarë gjykatash në apel, 12 prokurorë si dhe 31 gjyqtarë  në gjykatat e shkallës së parë dhe apelit në shkallë Republike, ku 12 prej kësaj janë në gjykatat e Tiranës. Deri tani kanë me njollë të “kuqe” 66 gjyqtarë e prokurorë.

Po këto burime tregojnë se këto të dhëna i ka kërkuar dhe një ambasade të rëndësishme në Tiranë, e cila do t’ja kalojë specialistëve të huaj që do marrin pjesë në Vetting.

Po kështu me urdhër të ministrit Manjani nuk lejohet asnjë shitje, transferim apo veprim tjetër në Ipoteka e asnjë prokurori dhe gjyqtari deri në fillimin zyrtar të ligjit të Vettingut, i cili do të vendosë për fatin e tyre.