Monika Kryemadhi: Bashkëpunëtori i afërt i Saimir Tahirit sfidon ONM

Monika Kryemadhi doli sot para mediave. Që në fillim ajo foli për vrasjen e liderit të serbëve të Kosovës Oliver Ivanoviç, vrasje e cila ka ndodhur pak para fillimit të konferencës së saj të shtypit.

Më pas Monika Kryemadhi foli për keqqeverisjen e Edi Ramës dhe krimin e organizuar që po bashkëpunon e drejton kryeministrin. Ajo foli për varfërinë e njerëzve të thjeshtë dhe oligarkinë e cila ka kapur kryeministrin dhe qeverinë. Në lidhje me protestën e 27 janarit Kryemadhi tha se do të protestohet kundër kryeministrit që ka kapur krejt pushtetet dhe po varfëron shqiptarët. Protesta do jetë qytetare, por nëse na provokojnë do marrin përgjigjen e duhur-

Monika Kryemadhi theksoi se Edi Rama ka destabilitet mendor dhe duhet kuruar, por edhe rrëzuar, pasi është rrezik kombëtar. Kjo është akuzë e rëndë ndaj kryeministrit. Kryeministri është edhe mashtrues, shtoi Kryemadhi, ndaj duhet ta rrëzojmë me çdo kusht.

Më pas ajo tha se Rama mori SHISH, prokurorinë, e tani po merr edhe futbollin. Opozita duhet ta ndalojë këtë aventurier që po shkatërron vendin dhe nuk duhet ta lemë atë ta çojë Shqipërinë në destabilitet, vazhdoi Kryemadhi.

Kryemadhi tha: “Ne e themi përsëri se jemi gati për t’u ulur dhe futur Parlamentin në shinat kushtetuese, sepse historia politike e Kryeministrit që ka një destabilitet mendor, tregon se e ka kthyer në instrument uzurpimin e institucioneve shtetërore; ai detyroi Visho Ajazin të japë dorëheqjen, kapi Prokurorin e Përgjithshëm dhe tani do të marrë edhe Federatën e Futbollit. Ka dashur të marrë dhe universitetet”.

Kapjen e reformës në drejtësi nga Rama, Kryemadhi e ka ilustruar edhe me emrin e Sekretarit të Përgjithshëm të Kuvendit, Genc Gjonçaj, i cili ka qënë bashkëpunëtori më i afërt i Saimir Tahirit edhe për tenderat e Ministrisë së Brendshme. Ai tha kryetarja e LSI ka qenë sekretar i përgjithshëm në kohën kur Saimir Tahiri ishte ministër.

“Më kot BE-ja ka harxhuar miliona, – tha Kryemadhi, – sepse del Genc Gjonçaj dhe hedh poshtë konsulencën e BE-së dhe vendos konsulencën e tij. Ne duhet të jemi shumë të hapur për të treguar sesi reforma në drejtësi është e kapur nga një grup i strukturuar kriminal”.

Po ashtu, kryetarja e LSI i ka kthyer përgjigje Ramës edhe për ironinë që ai përdori duke e emërtuar opozitën  si “ÇÇ”, bashkim i Çadra dhe Çizmja.

“Sa i përket asaj ÇÇ-së, – theksoi Kryemadhi, –  Çizmes së krimit të organizuar, me çizme do t’i përgjigjen shqiptarët dhe Rama e di këtë më mirë nga të gjithë.”