PS “bojkoton” Kuvendin. Kryemadhi: Koha e Edi Ramës është drejt fundit

Për herë të parë Parlamenti nuk është bojkotuar nga opozita, por nga mazhoranca. Ditën e sotme, pas tensioneve mes PS dhe opozitës, kryeministri Edi Rama dhe deputetët e selisë rozë u larguan nga salla e seancave. Bashkë më ikjen e deputetëve nga salla e Kuvendit u urdhërua dhe largimi i medieve që raportojnë aktivitetin parlamentar. Deputetët e opozitës kanë vijuar “seancën” duke bërë transmetime nga Facebook nga salla e Kuvendit.

Në fjalën e saj, kryetarja e LSI-së, Monika Kryemadhi u shpreh se zgjidhja e krizës politike është largimi i kryeministrit Edi Rama. Kryemadhi tha se shqiptarët nuk e duan më këtë qeveri dhe se “Rama do të mbetet vetëm me kriminelët e tij”.

Kryetarja e LSI-së, paralajmëroi se qeverisja e Edi Ramës është drejt fundit.  “Kemi detyrim ndaj shqiptarëve, por edhe socialistëve, që u mashtruan nga Rama. Sot ne duhet të jemi më të qartë se kurrë për t’i thënë Ramës dhe kriminelëve të tij se ata janë vetëm. Shqiptarët janë të gjithë ata burra dhe gra, pensionistë, djem e vajza, që luftojnë çdo ditë për bukën e gojës dhe për të pasur një vend pune, një jetë më të mirë. Rama i do shqiptarët të varfër, të kapur, sepse vetëm kështu ai mund të mbretërojë në mbretërinë e tij të krimit. Rama nuk ka kuptuar akoma që momente te tij janë drejt fundit, nuk ka më asnjë njeri që ta mbrojë. Ndihet i fortë për paratë që ka për të paguar televizione, por shqiptarët nuk i blen dot”,-tha Kryemadhi.

Duke folur për bojkotin e PS dhe qeverisë ndaj Kuvendit, Kryemadhi tha se sot parlamenti është i qetë. Kryetarja e LSI tha se sot përfaqësuesit dhe ambasadorët e krimit kanë dalë jashtë Parlamentit.

”Misioni ynë nuk është vetëm këtu, por të sensibilizojmë shqiptarët për të kundërshtuar çdo veprim arbitrar dhe të largojmë Edi Ramën. Vetëm kështu, ai do gjejë qetësinë e shpirtit të trazuar, që nuk e lë të flejë. E vetmja mënyrë e tij është të largohet sa më shpejt, t’i krijojë hapësirë vetes së tij në llumin e vet, që e ka uzurpuar. Unë ju lutem të gjithë socialistëve që të largohen prej tij, sepse ai është element kriminal që bleu PS 11 vite më parë dhe e tjetërsoi në partinë e krimit e trafikut, dhe të mjerimit të shqiptarëve”,-shtoi më tej kryetarja e LSI-së.

VIDEO/FJALA E KRYEMADHIT NE KUVEND 

https://www.facebook.com/KryemadhiMonika/videos/1634577729988296/

FOTOGALERI/ÇFARË NDODHI SOT NË KUVEND

Fjala e plotë në Kuvend e Kryetares së LSI-së, Monika Kryemadhi:

Sot shohim një parlament, që ashtu siç tha dhe z.Vasili, I është dhënë me koncension krimit të organizuar. Ky parlament tregon që është një vegël në dorën e krimit të organizuar, por mbi të gjitha është një detyrë e jona për tu përballur si një detyrim ndaj 600.000 votuesve që na kanë votuar, që na kanë besuar dhe që besojnë te demokracia. Janë 5000.000 shqiptarë të tjerë të cilët kanë ikur për shkak të varfërisë dhe për shkak të luftës që krimi I organizuar I ka shpallur atyre, sidomos të rinjve.

Qeveria e kukullave apo cirku shëtitës i Edi Ramës, që tashmë ka më lirë miellin e kokainës se sa miellin e bukës për shqiptarët e varfër, sot ikën dhe ndihet i lumtur dhe krenar që shqiptarët janë të varfër. Edi Rama nuk ka nevojë për mirëqenien e Europës, nuk ka nevojë për ndihmën e Europës, sepse vetë ai ka një mirëqenie për familjen e tij dhe veten e tij dhe entuarazhin e tij të krimit të organizuar. Por shqiptarët kanë nevojë për të bërë gjërat të cilat i kanë aspiruar dhe i ëndërrojnë në 27 vjet demokraci dhe pluralizëm që ne jetojmë. Krimi, droga çdo gjë që ka uzurpuar këtë vend, në fakt na japin disa objektiva shumë të mëdha, që ne si opozitë nuk duhet të ndalojmë. Kemi detyrimin moral ndaj qytetarëve, ndaj shqiptarëve, por detyrim dhe ndaj socialistëve, të cilët u mashtruan dhe votuan në 25 qershor Edi Ramën, për ta kthyer Shqipërinë shqiptarëve dhe për ta larguar nga duart e krimit të organizuar. Sot ne duhet të jemi më të qartë se kurrë për ti thënë Edi Ramës dhe kriminelëve të tij, që ata janë vetëm.

Nuk janë shqiptarët kukullat e veta që ka këtu në parlament. Nuk janë shqiptarët as ministrat dhe as ministret e tij, të cilat i ka me burra të ngatërruar me krimin e organizuar, me familjarë të ngatërruar me krimin e organizuar, me vëllezër dhe motra të ngatërruar me krimin e organizuar dhe me trafikun e drogës, por shqiptarët janë të gjithë ata, burra dhe gra, pensionistë, djem dhe vajza, studentë dhe gjimnazistë, të cilët luftojnë çdo ditë për bukën e gojës, dhe luftojnë çdo ditë për të pasur një vend pune, për të pasur një jetë më të mirë. Edi Ramai i do shqiptarët të varfër, Edi Rama i do shqiptarët të kapur, sepse vetëm në këtë mënyrë ai do të mbretërojë në mbretërinë e tij të krimit të organizuar. Por Edi Rama nuk di një gjë. Edi Rama nuk ka kuptuar akoma që momentet e tij janë drejt fundit. Nuk ka më asnjë njeri që ta mbrojë atë. Ndihet më i fortë ndoshta për shkak të kriminelëve që ka rreth vetes së tij, ndihet i fortë për paratë që ka dhei përdor për të paguar media, televizione, të huaj, por nuk kupton një gjë tjetër, që shqiptarët nuk i blen dot. Mund tju blejë varfërinë, por shpirtin jo. Sot parlamenti është i qetë, sepse të gjithë përfaqësuesit dhe ambasadorët e krimit të organizuar në këtë sallë, kanë dalë jashtë, por kjo nuk do të thotë që misioni ynë është vetëm këtu në këtë foltore. Misioni ynë është për ti sensibilzuar shqiptarët, jo vetëm me protesta, por për ti sensibilizuar për të kundërshtuar çdo veprim arbitrar, çdo uzurpim të pronave për të kundërshtuar çdo veprim të paligjshëm. Ashtu siç kërcënon Edi Rama çdo ditë qytetarët, ashtu të çohen dhe qytetarët dhe bashkë me ne, ju të kërcënojmë Edi Ramën, por ta largojmë atë. Sepse largimi i Edi Ramës nuk është vetëm shpëtim për shqiptarët, por është shpëtim për Edi Ramën dhe familjarët e tij.

E them këtë, sepse vetëm kështu ai do të mund të gjejë qetësi në shpirtin e tij të trazuar, i cili nuk e lë më të flejë i qetë. Por qetësia e cila atij i mungon, ai nuk mund ta gjejë dot duke terrorizuar shqiptarët, por e vetmja mënyrë e tij është të largohet sa më shpejt. Të iki, të jetë i qetë dhe ti krijojë hapësirë vetes së tij në llumin e vetë që ka rënë. LLumi dhe era e keqe që ka uzurpuar Edi Ramën nuk ka pse ta kalojë dhe ta tjetërsojë te shqiptarët. Unë do të lutem nga kjo foltore, edhe pse nuk janë, të gjithë socialistëve që të largohen prej tij, sepse ai nuk është Partia Socialiste, ai është një segment kriminal, i cili rrëmbeu Partinë Socialiste 11 vjet më parë dhe faktikisht nga një Partia Socialiste e vlerave të socialdemokracisë e tjetërsoi në partinë e krimit, të trafikut dhe të mjerimit të shqiptarëve. Prandaj nga foltorja e parlamentit, u bëj thirrje të gjithë atyre socialistëve të ndershëm, edhe atyre pak deputetëve që janë këtu në këtë sallë si përfaqësues të Partisë Socialiste të sensibilizojnë partinë e tyre dhe të largojnë Edi Ramën, nëse duan ta shpëtojnë atë. Në të kundërt, historia e PS prej 80 vjetësh është e destinuar për tu mbyllur në këtë vit.