Në Afganistan qeveria e re veç me burra, gratë protestojnë

Qeveria e re e talebanëve në Afganistan do të jetë islamike. Konfirmimin e bëri zëdhënësi Zabihullah Mujahid, i cili shpreson që diskutimet dhe konsultimet për formimin e ekzekutivit të përmbyllen mirë. Mullahu, Abdul Ghani Baradar, bashkëthemelues i grupimit të militantëve, do të vendoset në drejtim të punëve të përdtishme të qeverisë. Ende pa filluar punën, është e dukshme që frika ka kapluar vendin.

Nuk ka asnjë gjasë që gratë të jenë pjesë e qeverisë së re, të paktën në rolin e ministreve. Talebanët nuk kanë përjashtuar ndonjë rol periferik. Vlen të kujtohet thirrja që drejtuesit u bënë grave në Afganistan që të qëndrojnë në shtëpi për disa kohë pasi militantët nuk janë mësuar t’i respektojnë.

Ndoshta për këtë arsye po shmanget dhe përfshirja e tyre në qeveri. Megjithatë për të ngritur zërin kundër kësaj pabarazie, dhjetra gra afgane dolën në shesh në Herat, në një protestë të guximshme për të mbrojtur të drejtën e punës. “Është e drejta jonë për të pasur shkollim, punë dhe siguri”, kanë brohoritur në unison manifestueset.