Në datat 14–16 gusht 2026, Vajza e Vlorës, vendlindja e poetit të shquar Ali Asllani, mirëpret edicionin e katërt të “VajzëFest”

Në datat 14–16 gusht 2026, Vajza e Vlorës, vendlindja e poetit të shquar Ali Asllani, do të mirëpresë edicionin e katërt të “VajzëFest”, një festë që bashkon artin, poezinë, librin, muzikën, teatrin, sportin dhe traditën.

Për tri ditë, Vajza do të shndërrohet në një hapësirë të gjallë kulturore dhe festive, me shfaqje teatrore, humor, muzikë, veprimtari për fëmijë, ekspozita pikture, stenda libri, këngë e valle tradicionale, si dhe vizita në disa prej pasurive natyrore e historike të zonës.

Një nga ngjarjet më të rëndësishme të këtij edicioni do të jetë mbrëmja poetike e 15 gushtit, kushtuar krijimtarisë së Ali Asllanit dhe Ismail Kadaresë, me pjesëmarrjen e aktorëve të njohur Yllka Mujo, Ndriçim Xhepa, Luiza Xhuvani dhe Rozeta Ferri.

Në këtë mbrëmje do të lançohet për herë të parë “Çmimi Ali Asllani për Poezinë”, një nismë që synon të nderojë trashëgiminë poetike të Ali Asllanit, të mbështesë krijimtarinë bashkëkohore dhe të kthehet në një traditë të përvitshme të VajzëFest. Do të prezantohet gjithashtu ribotimi i veprës së poetit nga Shtëpia Botuese Dudaj.

Programi përfshin edhe Ditën Olimpike në Parkun Arkeologjik të Amantias, të organizuar nga Komiteti Olimpik Kombëtar Shqiptar, si dhe interpretime nga Gent Zeneli, Irini Qirjako, Marjola dhe Jurgen Kaçani, West Side Family, artistë të tjerë dhe Ansambli Popullor i Këngëve dhe Valleve.

“VajzëFest” është një ftesë për të rizbuluar Vajzën, historinë, natyrën, kulturën dhe mikpritjen e saj.