Opozita: Nisim mosbindjen civile. Jo zgjedhje fasadë, duam qeveri teknike

Pas takimit të zhvilluar sot në orën 18:00 koalicioni i partive opozitare ka dalë me një deklaratë të përbashkët.

Partitë e opozitës konfirmojnë qëndrimin për mosbindje civile, si dhe janë kundër çdo tryeze apo procesi zgjedhor fasadë. Opozita vendos si kusht krijimin e qeverisë teknike.

Deklarata e plotë:

Koalicioni Opozitar vendosi sot njëzëri përshkallëzimin e aksionit politik të opozitës, për të mos lejuar diktatin e krimit e të drogës me mbështetje qeveritare mbi votën e qytetarëve.

Koalicioni opozitar konfirmoi vendosmërinë për të mos lejuar votim fasadë të diktuar nga krimi dhe droga, duke nisur nga Kavaja.

Në funksion të këtij vendimi, të gjitha partitë politike anëtare të Koalicionit Opozitar, rikonfirmuan angazhimin masiv politik dhe popullor për mosbindje civile. Në kuadër të organizimit të mosbindjes civile dhe moslejimit të një procesi fasade elektoral, u miratua ngritja e shtabit koordinues të opozitës së bashkuar për bashkërendimin e aksionit popullor.

Po ashtu, Koalicioni i bashkuar Opozitar, dënoi dhe hodhi poshtë përpjekjet për tryeza fasadë me qëllim manipulimin e njëanshëm të Kodit Zgjedhor dhe klonimin e koalicioneve dhe opozitave fasadë në shërbim të narkoqeverisjes.

E vetmja zgjidhje për krizën politike në vend është krjimi pa vonesë i qeverisë teknike dhe dhënia e mandatit për krijimin e kushteve për zgjedhje të lira e të ndershme.

Koalicioni opozitar shpreh mirënjohjen për qëndresën e qindra-mijë qytetarëve në mbrojtje të lirisë dhe të drejtës themelore të votës së lirë dhe u bën thirrje qytetarëve shqiptarë për bashkimin më të madh popullor kundër krimit dhe drogës në pushtet. Fitorja i takon popullit të bashkuar për një Republikë të Re të Demokracisë, Lirisë dhe Drejtësisë së vërtetë.​

LEXONI EDHE:

Rama: Nuk kam çfarë t’i bëj më Lulit!

McAllister: Tirana është në krizë të rëndë politike zgjedhore

Një plan B për daljen nga kriza?

Përfundon takimi i ambasadorëve me kreun e Kuvendit Meta

“Shqipëria ndodhet në prag të kolapsit politik”

Reagimi i Dash Shehit, Agron Dukës dhe Nard Ndokës

Lulzim Basha shpall fillimin e përplasjes fizike me pushtetin