Opozita vendos: Protestë me 27 Janar para zyrës së kryeministrit Edi Rama

Grupi Parlamentar i Partisë Demokratike ka zyrtarizuar sot datën e protestës së madhe opozitare. Tubimi i parë i madh i frontit opozitar do të mbahet të shtunën e 27 Janarit. Burime nga mbledhja e PD-së thanë për “Koha Jonë” se është rënë dakord që protesta të zhvillohet në bulevardin “Dëshmorët e Kombit”, në orën 12:00, para zyrës së Kryeministrit Edi Rama. Opozita do të kërkojë largimin e kreut të qeverisë dhe synohet që më 27 Janar të jetë një nga protestat më masive, por jo e vetmja. Në mbledhjen e grupit të PD dhe në diskutimet me aleatët është rënë dakord që protestat të jenë pa afat duke mos përcaktuar mbarimin e tyre.

Detajet sesi do të zhvillohet ky tubim masiv i opozitës pritet të saktësohen në ditët në vijim, pas koordinimit të forcave opozitare. Nga partitë opozitare PD dhe LSI kanë nisur që dje organizimin e aktivistëve dhe anëtarëve të partisë për pjesëmarrje sa më të madhe në protestë.

Kryetarja e LSI-së, Monika Kryemadhi zhvilloi sot një takim me drejtuesit e të gjitha degëve të partisë në rrethe. Takimi me drejtuesit e LSI-së ishte për të organizuar protestën e madhe të fundit të janarit. Kryemadhi ka bërë thirrje që të gjitha strukturat të ngrihen në këmbë kundër kryeministrit të drogës. ‘Të gjithë strukturat e LSI-së të jenë në këmbë kundër kryeministrit të drogës dhe varfërisë. Organizim kapilar i LSI-së për rezistencë pa kompromis ndaj banditizmit qeveritar’, thanë burimet nga LSI.

Me tone të ashpra, Kryemadhi ka bërë apel për rezistencë ndaj rilindjes, që sipas saj, është e kapur nga krimi dhe mafia. “Rezistencë në të gjitha frontet në çdo familje dhe në çdo shesh. Fronti i gjerë kombëtar opozitar përballë rilindjes se vetmuar te lidhur me krimin”, ka qenë porosia që Monika Kryemadhi ka dhënë për kryetarët e LSI-së në rrethe.

Kryemadhi ka porositur drejtuesit e LSI-së që të orientojnë njerëzit se këto protesta nuk janë për të marrë pushtetin dhe për të zëvendësuar keqqeverisjen, por për t’i dhënë fund një pushteti kriminale dhe bandites.

Po ashtu dhe kreu i PD, Lulzim Basha ka nisur takimet me strukturat dhe drejtuesit e PD-së në rrethe për të organizuar nisjen e protestave më të mëdha në vend.

Drejtuesit opozitarë premtojnë një protestë të fortë. Vendi i zgjedhur, përballë zyrës së Edi Ramës duket se do të jetë një tubim masiv ku opozita do të tregojë forcën e saj protestuese.