Papa Leo ka deklaruar se fjalimi i tij ku kritikonte “tiranët” për shpenzimin e miliarda dollarëve në luftëra, nuk kishte për qëllim të debatone me Donald Trump. Pontifiku theksoi se komentet, të bëra disa ditë pas një përplasjeje të profilit të lartë me presidentin amerikan, ishin shkruar dy javë më parë, “shumë kohë para se presidenti të komentonte për mua”. Ai u tha gazetarëve në bordin e një fluturimi për në Angolë të shtunën se “megjithatë, u pa sikur po përpiqesha të debatoja, sërish, me presidentin, gjë që nuk është aspak në interesin tim”.
Kjo vjen pasi të hënën, Trump kishte nisur një sulm të ashpër ndaj Papës së parë amerikan – i cili ka qenë një kritik i zëshëm i operacionit ushtarak SHBA-Izrael në Iran – duke e cilësuar atë “të tmerrshëm për politikën e jashtme”. Papa, i cili aktualisht është në një tur në Afrikë, tha të shtunën se ishte zhvilluar një “narrativë e caktuar që nuk ka qenë e saktë”, duke cituar “situatën politike të krijuar” nga komentet e Trumpit.
Gjatë një fjalimi në Kamerun të enjten, ai kritikoi udhëheqësit që “mbyllin sytë ndaj faktit se miliarda dollarë shpenzohen për vrasje dhe shkatërrim, ndërkohë që burimet e nevojshme për shërim, edukim dhe restaurim nuk gjenden askund”. Ai shtoi se “zotërinjtë e luftës pretendojnë se nuk e dinë se duhet vetëm një moment për të shkatërruar, megjithatë shpesh një jetë e tërë nuk mjafton për të rindërtuar”. Papa dënoi gjithashtu “një cikël të pafund destabilizimi dhe vdekjeje” në një rajon “të njollosur me gjak” të Kamerunit, i cili ishte përfshirë nga kryengritja për gati një dekadë.
Këto komente u interpretuan nga disa si një referencë ndaj Trumpit – i cili më vonë u tha gazetarëve: “Papa mund të thotë çfarë të dojë, dhe unë dua që ai të thotë çfarë të dojë, por unë mund të mos pajtohem.” Trump fillimisht kishte postuar kritikën e tij të gjatë ndaj liderit të Kishës Katolike pasi pontifiku kishte shprehur shqetësimin për kërcënimin e Trumpit se “një qytetërim i tërë do të vdesë” nëse Irani nuk pranonte kërkesat e SHBA-së për t’i dhënë fund luftës dhe për të hapur Ngushticën e Hormuzit.
Presidenti amerikan kishte deklaruar se nuk ishte “një fans i madh” i Papës dhe e quajti atë “TË DOBËT për krimin, dhe të tmerrshëm për Politikën e Jashtme”. Trump gjithashtu postoi një imazh të gjeneruar nga AI të vetes, i cili e portretizonte atë si një figurë të ngjashme me Jezusin, të cilin më vonë e hoqi. Turneu i liderit katolik në Afrikë përfshin ndalesa në 11 qytete në katër vende. Është vizita e tij e dytë e madhe jashtë vendit që nga zgjedhja e tij në papat vitin e kaluar, dhe pasqyron rëndësinë e Katolicizmit në Afrikë, ku jeton më shumë se një e pesta e katolikëve të botës – rreth 288 milionë njerëz – sipas shifrave të vitit 2024.
Marrë nga BBC News