Presidenti Bujar Nishani dekreton datën. Zgjedhjet më 18 qershor 2017

Presidenti Bujar Nishani ka dekretuar sot datën e mbajtjes së zgjedhjeve të përgjithshme Parlamentare. Kreu i shtetit ka caktuar 18 qershorin 2017, si ditën e zgjedhjeve.

Datat e zgjedhjeve është shpallur 195 ditë para mbajtjes së tyre. Sipas Kodit Zgjedhor, “Presidenti i Republikës nxjerr dekretin për caktimin e datës së zgjedhjeve për Kuvendin jo më vonë se 9 muaj para mbarimit të mandatit të Kuvendit”.

Caktimi i datës së zgjedhjeve vjen kur ende klasa politike nuk ka miratuar ndryshimet në Kodin Zgjedhor. Në precedentët e mëparshëm në vend, kur është caktuar data e zgjedhjeve, ky proces ka shënuar jo zyrtarisht edhe nisjen e fushatës elektorale.

DEKRETI/PËR CAKTIMIN E DATËS SË ZGJEDHJEVE PËR KUVENDIN

Në mbështetje të nenit 92 shkronja “gj” dhe 93 të Kushtetutës së Republikës së Shqipërisë, si dhe të nenit 9, paragrafi 1 dhe 2, të ligjit         nr. 10019, datë 29.12.2008 “Kodi Zgjedhor i Republikës së Shqipërisë”, i ndryshuar,

D e k r e t o j

Neni 1

Zgjedhjet për Kuvendin të zhvillohen ditën e diel, më datë 18 qershor 2017.

Neni 2

 Ky dekret hyn në fuqi menjëherë.

 Nr. Dekreti  9883/Tiranë më 05.12.2016

Sipas Kodit Zgjedhor: Data e zgjedhjeve për Kuvendin caktohet me dekret nga Presidenti i Republikës, sipas rregullave të parashikuara në nenin 65 të Kushtetutës. Zgjedhjet për Kuvendin zhvillohen në një nga dy të dielat e fundit, brenda periudhës zgjedhore të përcaktuar në nenin 8 të këtij Kodi dhe në çdo rast jo më vonë se 30 ditë para datës së mbarimit të mandatit të Kuvendit. Në rast se mandati i Kuvendit përfundon më herët se 30 ditë nga fillimi i periudhës zgjedhore, zgjedhjet zhvillohen në periudhën zgjedhore pararendëse. Për efekt të këtij Kodi, mandati i Kuvendit mbaron në të njëjtën datë të të njëjtit muaj të vitit të katërt pas datës së mbledhjes së parë të tij.

Presidenti i Republikës nxjerr dekretin për caktimin e datës së zgjedhjeve për Kuvendin jo më vonë se 9 muaj para mbarimit të mandatit të Kuvendit. Me vendim të Kuvendit, mbyllja e legjislaturës ose shpërndarja e tij bëhen jo më shpejt se 45 ditë para datës së caktuar për zgjedhjet dhe jo më vonë se 30 ditë para kësaj date.