Presidenti Meta në Tropojë vlerëson Sali Berishën dhe Azem Hajdarin

Presidenti Ilir Meta këtë të shtunë ka zgjedhur t’i afrohet malit të Jezercës, por nga ana lindore. Njihet aventura turistike e presidentit, ku para disa javëve u ngjit në këmbë në majën më të lartë të Alpeve shqiptare, në Jezercë, 2694 metra mbi nivelin e detit.

Ndërsa dy ditë më parë ai nisi vizitën në Tropojë. Dje është ndalur në Bajram Curri, ku është shprehur se ky qytet përbën një epos plot histori dhe personalitete.

“Tropoja i ka dhënë shumë kombit shqiptar për lirinë dhe pavarësinë, për indentitetin dhe dinjitetin kombëtar. Mbarë populli shqiptar i është mirënjohës popullit të Tropojës për atë çfarë i ka dhënë kombit”, është shprehur Meta ndërsa nuk ka lënë pa përmendur edhe Azem Hajdarin.

“Jam sot këtu për t’u përkulur me respekt e mirënjohje të veçantë ndaj veprës së Azem Hajdarit, udhëheqësit të “Lëvizjes Studentore”.  Nuk duhet të harrojmë se dy udhëheqësit kryesorë të Lëvizjes Demokratike si Azem Hajdari, ashtu edhe Sali Berisha ishin nga Tropoja. Nuk duhet të harrojmë se pa vendimmarrjen dhe vendosmërinë e Sali Berishës edhe sot, Rruga e Kombit nga Tirana në Prishtinë mund të mos ishte bërë”, theksoi Meta ndërsa shtoi se Tropoja ka qenë dhe vazhdon të mbetet një krahinë me rëndësi strategjike mbarëshqiptare dhe fqinjësore.

Në vijim Presidenti Meta kërkoi nga të gjithë më shumë punë e përpjekje që siç tha ai këto Bjeshkë, dikur të quajtura të “Nëmura” duhet të punojmë që të quhen “Të bekuara”.

“ Tropoja ka qenë dhe mbetet një krahinë me rëndësi të veçantë strategjike midis Shqipërisë dhe Kosovës. Gjithçka e lidh Tropojën me Kosovën, asgjë nuk e ndan prej saj.” – tha Meta.

“Tropoja është një trevë e jashtëzakonshme thesari kulturor kombëtar. Zoti e bekoftë këtë vend të mrekullueshëm dhe popullin e mrekullueshëm të Tropojës”, shprehet më tej Presidenti.