Pritet mot i keq dhe stuhi. Bashkia e Tiranës mbledh shtabin e emergjencave

Gjatë 48 orëve në vijim parashikimet meteorologjike flasin për një mot të keq dhe me reshje të mëdha shiu. Për këtë qëllim Bashkia e Tiranës ka mbledhur Shtabin e Emergjencave në kryeqytet.

Bashkia e Tiranës njoftoi sot të gjithë qytetarët e saj se gjatë orëve në vijim dhe gjithë ditës së nesërme, sipas parashikimeve nga rrjetet meteorologjike vendase dhe të huaja, pritet një mot i keq me sasi të mëdha dhe reshje të dendura shiu, në nivele të atilla saqë mund të shkaktojnë vështirësi në qarkullim dhe bllokimin e disa prej rrugëve problematike të kryeqytetit.

Për këtë arsye, kryetari i Bashkisë së Tiranës, Erion Veliaj, ka thirrur sot shtabin e emergjencave për të ndarë detyrat për 24 administratorët dhe për të gjitha ekipet lokale të ndihmës, si dhe marrjen e të gjitha masave për përballimin e problematikave që mund të shfaqen gjatë mbrëmjes së sotme dhe ditës së nesërme.

“Bashkia e Tiranës ka angazhuar të gjitha ndërmarrjet e saj për të ndërhyrë e ardhur në ndihmë të qytetarëve për çdo situatë emergjente që mund të krijohet. Ndërmarrjet e rrugëve, pastrimit, kanalizimeve, ndriçimit, Policia Bashkiake, Inspektorati i Mbrojtjes së Territorit dhe Zjarrfikëset, kanë ngritur grupe të posaçme pune dhe do të jenë në terren, në shërbim të qytetarëve nga mbrëmja e sotme, së bashku me administratorët e 24 njësive administrative”,- thuhet në njoftim.

Gjithashtu, Bashkia e Tiranës u bën thirrje të gjithë qytetarëve që, gjatë natës së sotme dhe paradites së nesërme, kur pritet që intensiteti i rreshjeve të jetë më i lartë se zakonisht, të shmangin qarkullimin e panevojshëm. Po ashtu, Bashkia e Tiranës i bën thirrje qytetarëve që jetojnë në zonat rurale, që të marrin masa e të mos frekuentojnë brigjet e lumenjve në zonat që paraqesin rrezikshmëri.

“Bashkia e Tiranës ka evidentuar edhe rrugët më problematike dhe me mundësi më të lartë për t’u bllokuar, si dhe do të ketë në terren, gjatë gjithë natës së sotme, 1200 punonjës dhe mbi 60 mjete, në ndihmë të qytetarëve në rast nevoje. Bashkia e Tiranës do të bëjë çmos për të adresuar çdo problematikë që mund të lindë për shkak të reshjeve të shiut gjatë orëve në vijim, por kërkojmë mirëkuptimin e të gjithë qytetarëve të Tiranës për çdo shqetësim që ata mund të hasin, qoftë me trafikun e rënduar, qoftë me bllokimin e rrugëve që shfaqen si problematike pas rreshjeve të dendura të shiut”,- njoftoi Bashkia.

Bashkia njofton se “në raste emergjencash, ju lutemi të kontaktoni Bashkinë e Tiranës në numrin 0800 0888 (nga numrat fiks), Policinë Bashkiake në numrin 04 24 19 465, Zjarrfikëset në numrin 112 ose administratorin e njësisë tuaj administrative”.

Ndërkohë që meteorologët parashikojnë dhe probleme me reshjet në zona të tjera të vendit. Prej së martës pjesa më e madhe e vendit tonë do të përfshihet nga reshjet e dendura të shiut.

“Mëngjesi i së martës do të preket nga reshje të dendura në të gjithë territorin, kryesisht në Shkodër, Lezhë, Kryeqyteti, por dhe në jug të vendit. Do të jenë reshje shiu mbi 80 mm, që mund të shkaktojnë edhe përmbytje”, bën të ditur meteorologia Rezarta Xhakollari.

Reshjet e shiut pritet të sjellin dhe një rënie të menjëhershme të temperaturave. “Në zonat malore temperaturat nuk do të kalojnë 15 gradë, ndërsa në zonat e ulëta dhe ato bregdetare maksimalja nuk do të kalojë 22 gradë. Pra, kemi një rënie drastike me 10 deri në 15 gradë Celsius. Këto temperatura do të shoqërohen me një erë të fortë në det, me një valëzim nga 5 deri në 6 ballë”, sqaron Xhakollari. Shiu dhe këto nivele temperaturash do të vijojnë deri ditën e enjte, ndërsa gjatë fundjavës reshjet do të ulin intensitetin dhe temperaturat do të rriten sërish.