Pse “populli opozitar” nuk shkon në takimet e Ramës me “popullin”?

Kryeministri Rama ka filluar një tur nëpër rrethet e vendit. A është para përgatitje për fushatë apo thjesht takime, kjo mbetet për tu parë, porse ama kryeministri ka lëvizur nga Tirana. Natyrisht që e luan mjeshtërisht fushatën e takimeve, pasi këtë e ka pjesë të artit të tij manipulues, por ama del dhe flet. Debaton, sajon debate, flet, justifikohet, shantazhon, miklon, sulmon; gjithsesi ka ndezur bazën e tij dhe jo vetëm.

Nuk po i hyjmë debatit se ç’thotë apo ç’premton e justifikon. E kemi te mungesa e daljes së PD-së në bazë. Pse nuk dalin ballë për ballë me Ramën, ose me saktë pse nuk ndez Basha motorët opozitarë?

Si ka mundësi që PD-ja dhe Lulzim Basha nuk përballen me qeverinë në debate te salla ku shkon kryeministri dhe me popull? A i quan Edi Rama “takime me popullin dhe llogaridhënie”? Po. Atëhere, a është edhe opozita, popull?! Pse nuk hyjnë deputetët e opozitës në sallat e Ramës për të folur e debatuar mu përballë tij? Nuk janë takime me bazën e PS-së, paçka se ato fton në takime, porse kur kryeministri thotë se “janë takime me popullin”, pse nuk shkon populli opozitar me deputetët e tij në takimet e kryeministrit?

Nuk bëhet opozita vetëm me facebook apo me konferenca shtypi! Ku ka më mirë që në iks rreth ku do shkojë kryeministri Rama të dyndet edhe populli opozitar e deputetët e opozitës për të hyrë në sallën ku flet apo “debaton” kryeministri. Nuk është përplasje fizike, është përballje sy me sy me kryeministrin. Nëse Rama nuk lejon të hyjë edhe pjesa e popullit opozitar, atëhere edhe mund të ketë përplasje, por është faji i kryeministrit dhe populli do të shikojë nga media se nuk është llogaridhënie e qeverisë para popullit, por siç luan në të vertetë Edi Rama, me bazën e PS-së.

Kryeministri ua ka lëshuar sfidën popullit opozitar, kurse “populli opozitar” nuk guxon të shkojë në sallat ku kryeministrit jep “llogari para popullit (!)?