Rama ultimatum Bashës: Eja sot në takim. Nesër filloj zyrtarisht fushatën

Kryeministri Edi Rama ka hedhur poshtë çdo mundësi për zvarritje të bisedimeve me opozitën, nëse ato nuk ndodhin sot. Pas përfundimit të një takimi me të rinjtë që votojnë për herë të parë në Elbasan, burime afër kryeministrit bëjnë të ditur se Kryeministri është gati të takohet me presidentin Nishani dhe Lulzim Bashën sonte dhe të bisedojnë për zgjidhjen e krizës.

Sipas burimeve nga PS, përpjekja për t’i shtyrë takimet për nesër dhe ditët në vazhdim, është thjeshtë një përpjekje për të shkatërruar procesin që nuk do lejohet.

Ditën e sotme është folur për një takim mes Edi Ramës dhe Lulzim Bashës, në prani të Presidentit, Bujar Nishani.

Apelit të Presidentit, Bujar Nishani paraditen e sotme për uljen e palëve në politikë i është përgjigjur fillimisht kryeministri Edi Rama. Kryeministri thotë se është gatit ë ulet në çdo kohë për bisedime, por po pret që të njëjtën gjë të bëj dhe kreu i PD-së, Lulzim Basha.

Kryeministri shprehet se edhe ai është i shqetësuar për përmasat që po merr kriza politike në vend. “Z.President! Edhe unë jam i shqetësuar për përmasat që po merr kriza e PD!Jam gati t’i përgjigjem thirrjes suaj kaq të vonuar e të ulem me LB”,- shprehet Edi Rama.

Ditën e sotme, kreu i shtetit deklaroi se ishte i gatshëm të ndërmjetësonte mes palëve për zgjidhjen e situatës politike.

“Presidenti i Republikës, Sh.T.Z. Bujar Nishani po ndjek me shumë shqetësim përmasat që po merr kriza politike në vend. Ndaj edhe njëherë i kërkon Kryeministrit të vendit dhe Liderit të Opozitës të ulen në tryezën e bisedimeve me vullnetin për kompromis, për të tejkaluar këtë situatë të vështirë për vendin. Presidenti Nishani ofron të gjithë gatishmërinë dhe angazhimin e tij institucional në shërbim të këtij dialogu”,- thuhet në njoftimin e Presidencës.

Partia Demokratike ka bojkotuar prej më shumë se 70 ditësh Parlamentin dhe kërkon krijimin e një qeverie teknike. Negociatat e ndërkombëtarëve, deri më sot, nuk kanë sjellë asnjë kompromis mes palëve. Nesër skadon afati i fundit për regjistrimin e partive në zgjedhjet e 18 qershorit. Pas kësaj date nuk ka më asnjë hapësire të mundshme kohore që opozitës ti krijohen kushtet për të marrë pjesë në zgjedhje.

Edhe opozita i përgjigjet Nishanit: Gati të ulemi në tryezë për të biseduar

Deklarata e PD: Partia Demokratike dhe i gjithë Koalicioni Opozitar mirëpresin ftesën institucionale te Presidentit Nishani për dialog ne funksion te zgjidhjes se krizës se rende politike qe ka mbërthyer Shqipërinë.

Ndonëse shkaktari i kësaj krize Edi Rama me veprimet dhe qëndrimet e tij ka vendosur interesin e tij vetjak para interesave te qytetareve shqiptare, opozita dhe Partia Demokratike kane kërkuar gjithmonë rrugen e dialogut te vërtetë dhe jo fasade per tu bashkuar ne luften kunder krimit, droges, korrupsionit dhe kthimit te shtetit ne garnizon elektoral te pushtetit, qe kercenojne asgjësimin e zgjedhjeve, demokracisë dhe stabilitetit permes zgjidhjes se ofruar. Partia Demokratike dhe Koalicioni Opozitar rikonfirmojnë gatishmërinë e tyre duke ju përgjigjur pozitivisht ftesës se Presidentit Nishani.