Sherri për Teatrin. Rama: PD parti e zbrazur mendërisht e politikisht

Kryeministri Edi Rama ka reaguar mbi përplasjen tek Komisioni i Medias mes deputetëve demokratë dhe kryebashkiakut Erion Veliaj lidhur me çështjen e “Teatrit Kombëtar”.

Rama ironizon duke pyetur “Pse mos u japim një leje ndërtimi tek SHQUPi për Kullën e Sporteve Trup me Trup?”

Në reagimin e tij, kreu i qeverisë shton se PD është një subjekt politik që nuk ka më asnjë projekt veç dhunës. Duke qenë se sherri mes PS dhe opozitës është për ruajtjen e godinës së Teatrit Kombëtar, këtë çështje kreu i qeverisë e ka trajtuar si problem lejesh ndërtimi.

“Një parti e zbrazur mendërisht e politikisht(se shpirtërisht ka firuar me kohë),por e angazhuar fizikisht e ka kthyer debatin parlamentar në një teatër gjuhësh e gjymtyrësh të dhunshme! Pse mos u japim një leje ndërtimi tek SHQUPi për Kullën e Sporteve Trup me Trup??‍♂️???”-, shkruan Rama në Facebook.

Ky është reagimi i parë pas shumë javës i kreut të qeverisë lidhur me debatin për shembjen e Tetarit Kombëtar. Në muajin mars kryeministri Edi Rama ishte ai provokoi protestat e aktorëve duke prezantuar projektin për ndërtimin e teatrit të ri, duke konfirmuar shembjen e të vjetrit.

Reagimi i Edi Ramës erdhi pas përplasjeve të ashpra në Komisionin Parlamentar të Mediave. Opozita kishte thirrur sot në interpelancë ministren e Kulturës, Mirela Kumbaro, por në mbledhje u paraqit bashkë me ministren edhe kreu i Bashkisë së Tiranës, Erion Veliaj. Që në nisje të takimit, PD dhe kryetarja e komisionit deputetja demokrate, Albana Vokshi kërkuan që kryebashkiaku të largohej. Sipas demokratëve, seanca me kreun e bashkisë për Teatrin Kombëtar nuk ishte planifikuar për sot. Vokshi urdhëroi Gardën e Republikës që të nxjerrë jashtë nga mbledhja kryebashkiakun e Tiranës, por efektivët e gardës nuk i janë bindur. Për më shumë se një orë ka pasur tensione dhe debate mes deputetëve të opozitës dhe kreut të Bashkisë së Tiranës.

Reagon Basha: Rama, gjuhë batakçiu

Kreu i PD-së, Lulzim Basha i është përgjigjur sot deklaratave të Edi Ramës për çështjen e Teatrit Kombëtar dhe përplasjen e deputetëve të PD me kryebashkiakun Veliaj. Në një reagim në rrjetet sociale, Basha shprehet se PD është në mbrojtje të interesit publik. Ai e cilëson projektin e qeverisë për Teatrin si aferë kriminale.

Deklarata e plotë e Lulzim Bashës:

“Sot opozita mbrojti interesin publik dhe parlamentarizmin. Parlamenti duhet të përfaqësojë interesat e popullit dhe jo të mafias së ndërtimit, krimit dhe drogës. Por Edi Rama e ka të vështirë të bëjë dallimin midis batakut mes të cilit kalon gjithë kohën dhe parlamentit, prandaj edhe komentet e tij publike janë të gjitha me gjuhën e batakçiut.

Afera e Teatrit Kombëtar është grabitje kriminale që Edi Rama ka më se një vit që e përgatit në bashkëpunim me klientët e tij. Në këtë aferë do të vidhet prona publike për të ndërtuar kulla të larta që do financohen me para të krimit dhe drogës. Ky që garantoi karrierën me 20 për qindshin për çdo leje ndërtimi dhe u ngrit në majë të politikës me formulën “një pallat, një votë”, tani sillet si një bandit që do të grabisë 100 për qind të Shqipërisë.

I dështuar në qeverisje, i demaskuar para gjithë botës si i paaftë, i korruptuar dhe i kalbëzuar moralisht, Edi Rama kërkon ngushëllim dhe mbrojtje duke u bërë njësh me oligarkë, kriminelë dhe hajdutë për të mbrojtur pushtetin dhe bërë para duke betonizuar dhe grabitur Shqipërinë.

Dhunuesi i Parlamentit, Kushtetutës dhe ligjit është Edi Rama. Dhunuesi i shqiptarëve është Edi Rama që pasi u vodhi votën, po vjedh edhe pasurinë publike për të shtuar pasurinë e vet private. Dhunuesi i Shqipërisë është Edi Rama që po na mbyll derën e Europës për të pestin vit me rradhë. Sot ai mund të ngrejë kulla dhe të pastrojë paratë e drogës në çdo cep të Tiranës, por e afërt është dita kur këto zulllume do ta zënë poshtë bashkë me Fikun e Tiranës!”.