Tabaku: Për të mbuluar koncesionet abuzive, qeveria akuzon akuzuesit

Ish-deputetja demokrate Jorida Tabaku, analizon situatën e krijuar nga koncensionet e qeverisë “Rama”, ku shprehet se anëtarë të qeverisë për të mbuluar koncesionet abuzive dhe kriminale (si fjala vjen PPP Milot-Balldren, Orikum-Porti jahteve apo Thumanë-Kashar) ngrenë gishtin akuzues ndaj atyre që i akuzojnë.

Tabaku thekson se një situatë e tillë qesharake vjen pasi qeveria “Rama” ka 6 vjet në qeverisje, ka marrë në dorë Prokurorinë e Përgjithshme përmes shpikjes PPP Marku, Prokurorinë e Krimeve të Rënda dhe çdo institucion tjetër hetues në vend.

Dhe duke u ndalur tek shifrat e koncesioneve, ish-nënkryetarja e Komisionit parlamentar të Ekonomisë dhe Financave vëren se ndërsa BE ka përllogaritur koston e 1 kilometri rrugë në Autostradën Adriatiko-Joniane që të ketë vlerën 1.2 milionë euro, qeveria shqiptare për rrugë shumë herë me kushte gjeoteknike më të lehta ka vlerësuar në kontratat kriminale koston e 1 kilometër rrugë me një vlerë 16 milionë euro.

Propaganda në këto kushte, thotë Tabaku, tregon dëshpërimin që ka zënë mazhorancën dhe qeverinë, duke shtuar se sa më i afërt fundi, aq më i egër reagimi i qeverisë.

“Episodet humoristike të qeverisë “Rama” nuk lidhen vetëm me mënyrën se paraqitjes së kryeministrit në takimet zyrtare apo konferencat.

Ato shpesh zbresin edhe në zyrat e Kryeministrisë, ku anëtarë të qeverisë për të mbuluar koncesionet abuzive dhe kriminale (si fjala vjen PPP Milot-Balldren, Orikum-Porti jahteve apo Thumanë-Kashar) ngrenë gishtin akuzues ndaj atyre që i akuzojnë.

Një situatë e tillë qesharake vjen pasi qeveria Rama ka 6 vjet në qeverisje, ka marrë në dorë Prokurorinë e Përgjithshme përmes shpikjes PPP Marku, Prokurorinë e Krimeve të Rënda dhe çdo institucion tjetër hetues në vend.

Me gjithë këtë pushtet në dorë, me të gjitha mundësitë për të hetuar këdo nga qeveritë e shkuara, qeveria “Rama” zgjedh prapë gënjeshtrën propagandistike.

Ironia është se në vend që të hetohen ata që e ndanë Shqipërinë me traun 5 eurosh për interesa meskinë, ftohen të linçohen me akuza të dala boje ata që e bashkuan Shqiptarinë.

Heshtet për qeverinë dhe ministrat që kanë dhënë 2,2 miliardë lekë PPP për rrugë e shërbime që ende nuk kanë përfunduar dhe që i është fryrë kosto mbi dhjetë herë, ndërkohë që nuk janë dëgjuar të flasin kundër kontratave abuzive koncesionare të rrugës Milot-Balldren me vlerë 296 milionë euro dhe PPP-në e rrugës Porti Jahteve-Orikum me vlerë 70 milionë euro.

Ndërsa BE ka përllogaritur koston e 1 kilometri rrugë në Autostradën Adriatiko-Joniane që të ketë vlerën 1.2 milionë euro, qeveria shqiptare për rrugë shumë herë me kushte gjeoteknike më të lehta ka vlerësuar në kontratat kriminale koston e 1 kilometri rrugë me një vlerë 16 milionë euro.

Propaganda në këto kushte, tregon dëshpërimin që ka zënë mazhorancën dhe qeverinë. Sa më i afërt fundi, aq më i egër reagimi!”, shprehet ish-deputetja e PD-së, Jorida Tabaku.