Vetting-u shkarkon gjyqtarin që shpëtoi Dritan Dajtin

Komisioni i Pavarur i Kualifikimit, ka shkarkuar këtë të hënë nga detyra gjyqtarin Aleks Nikolli. Ky i fundit ka qenë pjesë e trupës gjykuese që rrëzuan dënimin me burg përjetë për Dritan Dajtin. Prej vitit 2019, Nikolli u vu nën hetim për korrupsion, si një nga tre gjyqtarët që vendosi zbutjen e dënimit të Dritan Dajtit, i dënuar për vrasjen e 4 policëve, dëshmorë të atdheut.

Nikolli iu nënshtrua vetëm një kriteri dhe hetimi gjeti pasaktësi në deklaratat e pasurisë, ndonëse gjyqtari i shkarkuar kërkoi riçelje të procesit. Pas kësaj seance, komisionerët largohen me pushimet e verës për tu kthyer në fillim të shtatorit ku vazhdojnë të jenë në pritje të procesit edhe 510 gjyqtarë e prokurorë nga 794 që kishte në total drejtësia.

Deri më tani janë ballafaquar me kontrollet 284 gjyqtarë e prokurorë nga të cilët në shkallën e parë u shkarkuan 104 prej tyre, ndërsa 118 u deklaruan të pastër. Ky bilanc është i ndryshueshëm në KPA që largoi edhe 12 nga ata që ishin konfirmuar në shkallën e parë, duke e çuar numrin e të shkarkuarve në 116 dhe të konfirmuarve në 106. Megjithë këto të dhëna gati tre vjet nga nisja e procesit, KPA që është fjala e fundit e kontrollit të drejtësisë në vend ka shpallur vetëm 65 vendime të formës së prerë.