Berati përkujton 82-vjetorin e Çlirimit, homazhe në Varrezat e Dëshmorëve

Berati ka përkujtuar 82-vjetorin e Çlirimit të qytetit, datë që shënon një nga momentet e rëndësishme të betejave të Ushtrisë Nacionalçlirimtare gjatë Luftës Antifashiste Nacionalçlirimtare.

Me këtë rast, në Varrezat e Dëshmorëve u zhvillua ceremonia përkujtimore, ku u kryen homazhe dhe u vendosën kurora e buqeta me lule në nderim të të rënëve për çlirimin e qytetit dhe gjatë luftës.

Në ceremoni morën pjesë ministri i Brendshëm dhe i Pushtetit Vendor, Ervin Demo, përfaqësues të pushtetit vendor, veteranë, familjarë të dëshmorëve, deputetë, efektivë të policisë dhe qytetarë. Ceremonia u shoqërua nga tingujt e Bandës Frymore të qytetit.

Pas homazheve u zhvillua edhe rivarrimi në Varrezat e Dëshmorëve i Agron Elezit, nga fshati Mbolan i Beratit. Elezi humbi jetën gjatë tërmetit të vitit 1967, kur shërbente si ushtar në kufi, ndërsa në vitin 2024 u shpall “Dëshmor i Atdheut”.

Gjatë fjalës së tij, ministri Ervin Demo vlerësoi sakrificën e dëshmorëve dhe theksoi rëndësinë e ruajtjes së kujtesës historike. Ai u shpreh se brezat e rinj duhet të njohin historinë e qytetit dhe kontributin e atyre që dhanë jetën për çlirimin e tij.

Një mesazh përkujtimor përcolli edhe kryebashkiaku i Beratit, Ervin Ceca.

Beteja për Çlirimin e Beratit u zhvillua më 13 shtator 1944, ku morën pjesë forca të Brigadës VII Sulmuese dhe batalione partizane të qarkut. Luftimet u zhvilluan në disa pika strategjike të qytetit, ndërsa 23 të rinj antifashistë mbetën dëshmorë dhe 30 të tjerë u plagosën.

Në total, rreth 225 dëshmorë nga Berati dhanë jetën gjatë Luftës Antifashiste Nacionalçlirimtare.