Me nismën e Kryetarit të Këshillit të Qarkut Berat, Donald Molishti, u zhvillua një takim me Hirësinë e Tij, Mitropolitin e Beratit, Vlorës dhe Kaninës, z. Asti Bakallbashi, dhe Kreun e Myftinisë së Beratit, Imam Bilbil Talla.
Ky takim kishte në qendër forcimin e bashkëpunimit mes institucioneve fetare, duke riafirmuar vlerat e respektit, mirëkuptimit dhe harmonisë që e karakterizojnë qytetin e Beratit. Në fjalën e tij, kryetari i Këshillit të Qarkut, Molishti theksoi se “Berati ka qenë dhe mbetet shembull i gjallë i bashkëjetesës fetare, një model që duhet ruajtur dhe përcjellë brez pas brezi”.
Nga ana e tyre, përfaqësuesit e komuniteteve fetare shprehën vlerësimin për këtë nismë, duke theksuar rëndësinë e forcimit të lidhjeve të ndërsjella dhe bashkëpunimit për të mirën e përbashkët të komunitetit. Ky takim simbolik që dëshmon bashkëjetesën dhe harmoninë fetare tregon për Beratin si një shembull frymëzues që ruan me fanatizëm trashëgiminë ndër shekuj.
