Foto e rrallë e ngritjes së flamurit në Shkodër më 1913

Një foto e rrallë është publikuar dje nga ngritja e flamurit shqiptar në Shkodër në vitin 1913. Siç edhe e përshkruan historiani Kastriot Dervishi këtë foto, të pranishëm kanë qenë edhe pesë përfaqësues nga fuqitë e mëdha botërore.

“Më 28 nëntor 1913, ora 10.00, në përvjetorin e parë të pavarësisë u ngrit flamuri kombëtar edhe në Shkodër. Qyteti administrohej në atë kohë nga një komision ndërkombëtar. Ceremonia u zhvillua në bashkinë e vjetër të qytetit. Aty folën guvernatori Filips dhe kryetari i bashkisë, Muharrem Gjylbegu.

Pesë fuqitë e mëdha: Britania e Madhe, Austrro-Hungaria, Italia, Franca dhe Gjermania, kishin përfaqësuesit e vet në këtë ceremoni. Aktiviteti u zhvilluar në harmoni të plotë vëllazërore, pa kurrfarë dallimi politik, apo fetar.

Në fund të fjalimeve është thirrur “Rroftë Shqipëria”, si dhe është kënduar “himni kombëtar” i shkruar nga Pashko Vasa “O moj Shqypni” – shkruan Dervishi përkrah fotos.