J’ACCUSE

Poezi nga: Bob Kaufman
Përktheu: Fadil Bajraj

Qyteti është një kurvë xheloze, i ashpërson trotuaret e vet kur na sheh si ecim drejt hënës,
u jep shpoti therëse hapave tanë ngurrues.

Qyteti është një kurvë xheloze,
i ndriçon të gjitha portat që na nevojiten,
për të gërmuar në gojat dhe flokët e njëri-tjetrit,
në mënyrë sadiste mbjell stacione autobusi në shtigjet tona.

Qyteti është një kurvë xheloze, qëllimisht ndërton rrokaqiej afaristë në ngastrat e pazëna ku ia ofronim veten njëri-tjetrit si haraç të pazakonshëm, yllit tonë personal.

Qyteti është një kurvë xheloze, ndriçon natën me mëngjes, na lë të përpëlitemi me atomet e paeksploduara që rrotullohen në ijët tanë.

Qyteti i bukur është një kurvë xheloze.