Kostot e pandemisë, Margariti: Kultura humbi afërsisht 29 milionë lekë

Mbyllja e vendit për shkak të pandemisë, sipas Ministrisë së Kulturës, ka shkaktuar humbje financiare përgjatë dy muajve. Në emisionin “Në fokus”, në TvT, ministrja e Kulturës, Elva Margariti, tha se përllogaritet që kjo humbje të jetë afërsisht 29 milionë lekë.

“Një përllogaritje që bazohet në të ardhurat e vitit të kaluar, kur pari mbi 1 milion vizitorë në sitet e Shqipërisë dhe përllogaritje statistike duke marrë parasysh edhe rritjen e biletës për vitin 2020. Gati 29 milionë lekë humbje, por është shifër që nuk mund të konsiderohet e plotë”, tha ajo.

Margariti tha se duke filluar nga e hëna e javës tjetër, do të nisë hapja e muzeve dhe parqeve arkeologjike në përputhje me masat e rekomanduara nga Ministria e Shëndetësisë, ndërsa shtoi se po shqyrtohet si opsion ai i teatrove dhe kinemave të hapura.

“Do të fillojmë me muzetë dhe parqet arkeologjike. Teatrot dhe kinematë, ende nuk e kemi një datë të mirëpërcaktuar sepse vetë dinamika e pandemisë është në studim. I kemi kërkuar Task Forcës së Ministrisë së Shëndetësisë që disa aktivitete të zhvillohen online. Ka opsione për disa aktivitete në qiell të hapur. Mendoj do të ishte një zgjidhje ajo e teatrove dhe kinemave të hapura. Po punojmë për këtë dhe jemi në konsultim me Ministrinë e Shëndetësisë”, tha ajo.

Sa i takon Teatrit Kombëtar, Margariti tha se kalimi në pronësi të Bashkisë së Tiranës nuk do të thotë tjetërsim funksionesh. Ajo shtoi se kjo çështje është politizuar, çka e ka tjetërsuar funksionin e artit dhe kulturës.

“Më vjen keq që është kthyer në një debat politik. Arti dhe kultura qëndrojnë përtej politikës dhe janë urë komunikimi. Më vjen keq që qasja politike e kësaj teme e ka kthyer në një moment ndarjeje. Koha do ta tregojë se ata që krijojnë ura mes arti dhe kulturës do të jenë gjithmonë përtej politikës”, tha ajo.